Մեծ սպորտի ապագա աստղերը. Արման Մնացականյան

Բռնցքամարտում Հայաստանը միշտ էլ ունեցել է ուժեղ մարզիկներ, որոնք տարբեր մրցաշարերում կարողացել են հաղթանակներ տոնել:

Երիտասարդ Արման Մնացականյանը եւս ցանկանում է մի օր նվաճել մեծ տիտղոսներ ու ճանաչելի դարձնել իր երկիրը:

Mediamax Sport-ը «Մեծ սպորտի ապագա աստղերը» շարքում այս անգամ անդրադառնում է բռնցքամարտիկ Արման Մնացականյանին:

Մարզաձեւը՝ բռնցքամարտ

Հանդես է գալիս՝ գերծանր քաշային կարգում

Տարիքը՝ 16 

Բնակավայրը՝ Փարաքար

Սովորում է՝ Երեւանի Օլիմպիական հերթափոխի պետական մարզական քոլեջում

Նվաճումները՝ Հայաստանում կայացած տարբեր մրցաշարերի հաղթող ու մրցանակակիր

Սիրում է լսել ռեփ ու կարդալ Ջեկ Լոնդոնի ստեղծագործությունները

Մարզական կերպարը՝ Մուհամմեդ Ալին

Նպատակը՝ դուրս գալ պրոֆեսիոնալ ռինգ ու դառնալ Աշխարհի չեմպիոն

Բռնցքամարտի սկիզբը. 9 տարեկան էի ու շատ էի երազում բռնցքամարտ պարապել: Մերոնց ասացի դրա մասին, սակայն նրանք դեմ դուրս եկան: Բայց ես իսկապես շատ էի սիրում այս մարզաձեւն ու ի վերջո համոզեցի նրանց: Սկզբում մեզ մոտ՝ Փարաքարում էի պարապում, ապա տեղափոխվեցի Օլիմպիական քոլեջ, որտեղ էլ արդեն 7 տարի է զբաղվում եմ բռնցքամարտով:

Մարզիկ լինելն այդքան էլ հեշտ բան չէ, անընդհատ պետք է քաշ պահել, պայքարել, ընտանիքից հեռու լինել: Անկեղծ եմ ասում, հավաքների ժամանակ շատ եմ կարոտում ծնողներիս ու քույրիկիս:

Հոգեբանությունն ու մարզիչը. Ինձ համար ավելի դժվար է հենց հոգեբանորեն պատրաստ լինելը, իսկ ահա ֆիզիկական տանջանքները հեշտ եմ հաղթահարում: Մրցումներցից առաջ մտածմունքներ եմ ունենում՝ ինչպես պատրաստվեմ, ռինգում ինչպես գործեմ: Բայց այդ ամենը հաղթահարում եմ մարզչիս օգնությամբ: Ֆեդյա Ալեքսանյանն ինձ լավ է հասկանում, իսկական մանկավարժ է, որի շնորհիվ էլ կարողանում եմ կենտրոնանալ միայն մենամարտի վրա:

Հիմա պատրաստվում եմ Եվրոպայի առաջնությանը, որն ինձ համար առաջինն է լինելու:  Մարտական եմ տրամադրված, աշխատելու եմ լավ ելույթ ունենալ, որպեսզի իմ ծնողների ու մարզչի այսքան տարիների չարչարանքը իզուր չլինեն:

Լուսանկարը` Մեդիամաքս