Մեծ սպորտի ապագա աստղերը. Զավեն Միքայելյան

Պատանի մարզիկների հաջողություններն, անկասկած, բոլորիս անչափ ուրախացնում ու ոգեւորում են: Այսօրվա նրանց ձեռքբերումներն ապագայում մեծ ու հաղթական ելույթների հույս են ներշնչում:

Mediamax Sport-ը «Մեծ սպորտի ապագա աստղերը» շարքում այս անգամ ձեզ պատմելու է  հունահռոմեական ոճի ըմբիշ Զավեն Միքայելյանի մասին:
 
Մարզաձեւը՝  հունահռոմեական ոճի ըմբշամարտ

Տարիքը՝ 17

Սովորում է՝ Ֆիզիկական կուլտուրայի հայկական պետական ինստիտուտում

Բնակավում է՝ Էջմիածնում

Տիտղոսները՝  Հայաստանի պատանիների չեմպիոն, Եվրոպայի ու պատանեկան Օլիմպիադայի փոխչեմպիոն

Մարզական կերպարը՝  Արսեն Ջուլֆալակյան

Սիրած բանաստեղծը՝ Եղիշե Չարենց

Նպատակը՝ դառնալ Օլիմպիական չեմպիոն, բայց մինչ այդ նվաճել ԵԱ-ի ու ԱԱ-ի ոսկե մեդալներ

Մարզաձեւի ընտրությունն ու կուռքերը. Փոքր տարիքում շատ աշխույժ եմ եղել, ու ծնողներս որոշել են ավելորդ էներգիան ճիշտ ծախսելու համար ինձ սպորտի տանել: Ինձ միշտ Արսեն Ջուլֆալակյանն ու Արթուր Ալեքսանյանն են ոգեւորել: Հեռուստացույցով դիտել եմ մեր հայտնի ըմբիշների ելույթներն ու ցանկացել նմանվել իրենց: Արսենն իմ կուռքն է, մենք նույն մարզչի սաներն ենք ու միասին ենք մարզվում: Ինձ դուր է գալիս նրա համեստությունն ու հասարակ պահվածքը:

Առաջին հաջողությունը. Ելույթներս 7 տարեկանից եմ սկսել, հանդես եմ եկել 29 կգ քաշային կարգում: Առաջին անգամ հաջողության եմ հասել Սեւան գյուղական մարզական միության կազմակերպած մրցաշարում: Դարձել եմ հաղթող ու 1-ին շնորհակալագիրը ստացել: Հետո էլի բազմաթիվ մեդալներ եմ նվաճել, բայց ինձ համար ամենաարժեքավորը 2014-ի Նանջինգի պատանեկան Օլիմպիադայի արծաթն է:

Օլիմպիական փորձը. Շատ պատրաստված էի մեկնել Նանջինգ, 6 հավաք էի անցկացրել, լավ մարզավիճակում էի, ուղղակի չստացվեց հաղթող դառնալ: Հիմնականում փորձի պակասը զգացնել տվեց ու մեծ լարվածությունը: Եզրափակչում մրցակիցս էլ շատ ուժեղ ու տիտղոսակիր էր: Կյանքիս նպատակն է, որ հաջորդ անգամ ռեւանշի հասնեմ նրա նկատմամբ: 2-րդ հորիզոնականը զբաղեցնելիս ըմբիշները միշտ տխրում են, ես էլ բացառություն չէի: Հաջորդ օրը միայն հասկացա, թե ինչքան կարեւոր գործ եմ արել ու ամենակարեւոր մրցաշարում մեդալ նվաճել: Զգում էի, որ երկրիս համար լավ գործ եմ արել: Շատ ուրախ էի, որ ամբողջ ժողովուրդն ինձ հետ է, աջակցում ու  ոգեւորում է: Օլիմպիադան ինձ մեծ փորձ տվեց, որը հետագայում շատ պետք կգա:

Անմոռանալի Չինաստան. Այդ 19 օրը, որ անցկացրել ենք Չինաստանում, անմոռանալի են եղել: Մենք մի մեծ ընտանիք էինք, բոլորս աջակցում ու ոգեւորում էինք իրար: Երբ ազատ էի լինում, փորձում էի մյուսների ելույթներին էլ հետեւել: Ինձ էլ մի շարք մարզիկներ են եկել աջակցելու: Հիշում եմ, Չինաստանում մի զբարճալի դեպք էլ տեղի ունեցավ: Ճաշարան քարտերով էինք մտնում, այնպես էր ստացվել, որ քարտս դահլիճում էի մոռացել ու ստիպված մի ամբողջ օր սոված մնացի:

Զավեն Միքայելյանը

Լուսանկարը` Մեդիամաքս