Մեծ սպորտի ապագա աստղերը. Արման Միքայելյան

Պատանի ու երիտասարդ մարզիկների հաջողություններով ուրախանում ենք բոլորս: Բացառություն չէր նաեւ Արման Միքայելյանը, որը մի քանի օր առաջ շախմատի Հայաստանի առաջնությունում ցույց տվեց հիանալի արդյունք, շատ մոտ էր չեմպիոն դառնալուն, սակայն միայն վերջին տուրում պարտություն կրեց ու գրավեց երկրորդ տեղը:

Mediamax Sport-ի «Մեծ սպորտի ապագա աստղերը» նախագծի այս հատվածում հյուրընկալել ենք Արման Միքայելյանին:

Մարզաձեւը՝ շախմատ

Տարիքը՝ 18

Սովորում է՝ Ֆիզիկական կուլտուրայի հայկական պետական ինստիտուտի 1-ին կուրսում

Բնակավում է՝ Երեւանում

Տիտղոսները՝ Հայաստանի այս տարվա փոխչեմպիոն, պատանեկան Օլիմպիադայի արծաթե մեդալակիր, նույն մրցաշարում անհատական ցուցանիշով գրավել է 3-րդ տեղը, միջազգային վարպետի նորմաներ լրացրել է Կարեն Ասրյանի հուշամրցաշարում ու մինչեւ 18 տարեկանների ԵԱ-ում, մինչեւ 14 տարեկանների ԵԱ-ի մրցանակակիր

Շախմատային կերպարը՝ Մագնուս Կարլսեն

Նպատակը՝ դառնալ գրոսմայստեր, ապա նաեւ տեղ գտնել ուժեղագույնների շարքում

18-ամյա արծաթե մեդալակիրը. Մինչ Հայաստանի առաջնության մեկնարկը մի քանի ամիս պարապեցի, ապա որոշ ժամանակ հանգստացա ու հիմնականում դասերով էի զբաղվում: Շատ մոտ էի չեմպիոն դառնալուն, սակայն վերջին տուրում պարտվեցի ու գրավեցի 2-րդ տեղը: Միգուցե, հայտնություն էի, բայց հատուկ պատրաստություն չէի տեսել ու նման արդյունքի չէի սպասում: Արդեն 4-5-րդ խաղից հետո զգացի, որ կարող եմ մրցանակային տեղ գրավել: Իհարկե, դրանից հետո ցանկությունս մեծացավ, բայց  ես ավելի հանգիստ ու կենտրոնացած էի խաղում՝ չփորձելով ամեն գնով չեմպիոն դառնալ: Միգուցե սա էլ լավ խաղի պատճառ հանդիսացավ:

Գրոսմայստերի նորմա. Ասում են, որ այս արծաթե մեդալից հետո շախմատասերները սկսել են խոսել իմ մասին: Չեմ կարծում, որ սա ինչ-որ բան է փոխել իմ մեջ: Ես պարզապես իմ գործն եմ արել:  Արդեն փետրվարին Եվրոպայի առաջնությանն եմ մասնակցելու: Այստեղ առաջին 20-յակում հայտնվելու դեպքում հնարավորություն կունենամ հանդես գալ Աշխարհի գավաթի խաղարկությունում:  Կպատրաստվեմ առաջնությանը, կփորձեմ որքան հնարավոր է լավ հանդես գալ ու կարողանալ լրացնել գրոսմայստերի նորման:

Արման Միքայելյանը

Լուսանկարը` Մեդիամաքս