Վերջին տարիներին մարմնամարզությունը մեր երկրում զարգանում է մեծ ու արագ քայլերով: Հաջողություններ են գրանցվում ոչ միայն մեծահասակների մրցաշարերում:
Այս տարի Արթուր Ավետիսյանը Եվրոպայի երիտասարդական առաջնությունում օղակների վրա վարժությունում արծաթե մեդալակիր դարձավ: Mediamax Sport-ի «Մեծ սպորտի ապագա աստղերը» շարքում այս անգամ պատմում ենք մարմնամարզիկի ու նրա սպորտային նպատակների մասին:
Մարզաձեւը՝ սպորտային մարմնամարզություն
Տարիքը՝ 18 տարեկան
Սովորում է՝ Ֆիզիկական կուլտուրայի հայկական պետական ինստիտուտի 2-րդ կուրսում
Բնակվում է՝ Երեւանում
Տիտղոսները՝ երիտասարդների Եվրոպայի առաջնության արծաթե մեդալակիր
Մարզական կերպարը՝ Ալբերտ Ազարյան եւ Հարություն Մերդինյան
Սիրած բանաստեղծը՝ Հովհաննես Շիրազ ու Պարույր Սեւակ
Նպատակը՝ դառնալ Օլիմպիական խաղերի մեդալակիր
Լուսանկարը` Մեդիամաքս
Առաջին քայլերը. 7 տարեկանում եմ առաջին անգամ մտել մարմնամարզության դահլիճ: Հիշում եմ, որ առաջին օրն Ալբերտ Ազարյանին տեսա, նա խոսեց ինձ հետ, շատ էի ուրախացել: Հայրիկս է ցանկացել, որ մարզիկ դառնամ: Սկզբում պարզապես գալիս էի մարզումներին, շատ բան դեռ չէի հասկանում:
Երբ առաջին անգամ մրցման մասնակցեցի ու 3-րդ տեղը գրավեցի, շատ ոգեւորվեցի, սիրեցի մարմնամարզությունն ու որոշեցի շարունակել պարապել: Ավելի եռանդով սկսեցի մարզվել, ու արդյունքներն էլ չուշացան: Մասնակցեցի Հայաստանի առաջնությանն ու հաղթող դարձա: Շատ ոգեւորիչ էր:
Էներգիայի աղբյուրը. Սպորտով զբաղվելը հեշտ գործ չէ, շատ որակներ են պետք առաջ շարժվելու համար: Առաջին հերթին պետք է ձգտում ունենալ, նպատակասլաց լինել, չդադարել աշխատել: Հենց այնպես ու հեշտությամբ նպատակներին չեն հասնում:
Ես էլ չեմ դադարում աշխատել ու նոր բաներ սովորել: Ամեն ինչ անում եմ մարզիչներիս ասածներն անելու համար: Փորձում եմ չբավարարվել ու նոր բարձունքների ձգտել:
Որքան էլ ամենօրյա մարզումները երկար ու ծանր լինեն, երբեք չեմ հոգնում դրանցից: Եթե մեկ օր չեմ գալիս դահլիճ, այդ ժամանակ եմ հոգնում: Մարզումներն ինձ էներգիա են տալիս ու լիցքավորվում:
Լուսանկարը` Մեդիամաքս
Անփոխարինելի մարզիչները. Առանց լավ մարզչի սպորտում ոչնչի էլ չես հասնի: Իմ բախտը բերել է, որ ես լավ մասնագետների հետ եմ աշխատում՝ Հայկ Նազարյան, Սոս Սարգսյան, Հակոբ Սերոբյան: Նրանք անփոխարինելի են, ինձ շատ կարեւոր խորհուրդներ են տալիս: Գիտեն մրցումների ժամանակ ինչպես օգնել ինձ:
Առաջին հերթին ասում են, որ չլարվեմ ու հանգստություն պահպանեմ:
Մեր թիմում տիրող հրաշալի մթնոլորտն էլ նրանց շնորհիվ է: Միշտ իրար կողքի ենք իսկական թիմի պես: Մարմնամարզության շնորհիվ ես ոչ միայն մեդալներ ու նվաճումներ եմ ձեռք բերել, այլ լավ ընկերներ գտել:
Սպասված մեդալը. Այս տարին կարեւոր էր իմ կարիերայում: Ինձ հաջողվեց երիտասարդների Եվրոպայի առաջնությունում արծաթե մեդալ նվաճել: Երկար էի սպասել այդ հաջողությանը: Ուրախ եմ, որ իմ ու մարզիչներիս տքնաջան աշխատանքն իր պտուղները տվեց:
Այն մինչ այժմ իմ ունեցած մեդալներից ամենակարեւորն ու նշանակալին է, հետագայում էլ պետք է ձգտեմ, որ ոչ միայն նվաճումներիս թիվն ավելացնեմ, այլ նաեւ գույնը փոխեմ:
Օղակների սիրահարը. Մարմնամարզությունը դժվար սպորտաձեւ է, ամեն գործիք իր բարդությունն ու առանձնահատկությունն ունի: Ես օղակների վրա եմ ուժեղ: Այս վարժությունն անելու համար պետք է ֆիզիկապես պատրաստված լինել ու լավ կոորդինացիա ունենալ: Երեւի Ալբերտ Ազարյանից է մեզ փոխանցվել, որ օղակների վրա ուժեղ ենք:
Արդեն մեծահասակների մրցումների եմ մասնակցելու, դա շատ ավելի պատասխանատու է: Վահագն Դավթյանն ու Արթուր Թովմասյանը շատ լավ են իրենց զգում օղակների վրա ու նրանց հետ մրցակցելը հեշտ չի լինելու:
Լուսանկարը` Մեդիամաքս
Փորձի կարեւորությունը. Երբեմն անհաջող ելույթից հետո պատահել է, որ հիասթափվել եմ ու ցանկացել թողնել ամեն ինչ: Բայց մի քիչ ժամանակ է անցնել, ու հասկացել եմ, որ այդպես էլ է լինում, պարտություններն ու անհաջողություններն էլ հաղթանակների պես կարեւոր են:
Ժամանակի ընթացքում ավելի շատ մրցաշարերի եմ մասնակցել, փորձ ձեռք բերել, հիմա կարողանում եմ կարեւոր ելույթներից առաջ հանգստություն պահպանել:
Ավելի փոքր տարիքում երբեմն վախ էի զգում, սակայն արդեն անցել է: Հիմա հարթակ դուրս գալուց առաջ միայն զգում եմ ադրենալինն ինչպես է մտնում մեջս ու սկսում եմ ելույթս:
Սպորտային օրինակը. Իր աշխատասիրության ու ձգտման շնորհիվ ինձ համար միշտ օրինակ է եղել Հարություն Մերդինյանը: Գրեթե ամեն օր տեսնում եմ նրա մարզումները, թե ինչպիսի եռանդով է աշխատում, ու ավելի հաճույքով եմ նվիրվում գործիս: Հենց միայն Հարությունին հետեւելու ժամանակ շատ բան եմ սովորում:
Ժամանակի ընթացքում մարմնամարզությունը մեր երկրում մեծ աճ է արձանագրել հենց այդ փորձառու տղաների շնորհիվ: Նրանք մարզաձեւը ոտքի են կանգնեցրել, մենք էլ ուզում ենք շարունակել սկսած գործը:
Արթուր Ավետիսյանի հետ զրուցել է Հասմիկ Բաբայանը
Լուսանկարները՝ Էմին Արիստակեսյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: