Մեկ կադրում. Ուրախությունից շապիկը հանած Աշխարհի չեմպիոնուհին

Ֆրանսիայում շարունակում է ընթանալ կանանց ֆուտբոլի Աշխարհի առաջնությունը: Մինչ թիմերը շարունակում են պայքարել հաղթողի կոչման համար, առաջարկում ենք Mediamax Sport-ի «Մեկ կադրում» շարքում ծանոթանալ 20 տարի առաջ նույն առաջնությունում արված մի հետաքրքիր լուսանկարի:

Փասադենայի «Ռոուզ Բոուլի» ստադիոնում ընթանում էր ԱԱ-1999-ի եզրափակիչն ԱՄՆ-ի ու Չինաստանի հավաքականների միջեւ: Խաղին 90 հազ. երկրպագուներ էին հետեւում, այդ ցուցանիշը մինչեւ այսօր անգերազանցելի է կանանց ֆուտբոլի համար:

Եզրափակչի հիմնական ժամանակն ավարտվեց գոլազուրկ ոչ-ոքիով ու հաղթողը որոշվեց հետխաղյա 11-մետրանոցներով:

Որոշիչ գոլի հեղինակը դարձավ ամերիկուհի Բրենդի Չեսթեյնը: Հաղթանակն ապահովելուց հետո նա հանեց իր մարզաշապիկն ու ծնկի իջավ: Ֆուտբոլիստուհու նկարը միանգամից հայտնի դարձավ ու տարածվեց ամբողջ աշխարհով մեկ: Այն զարդարեց «Newsweek», «Time», «Sports Illustrated» հայտնի ամսագրերի շապիկները:

Ամենահայտնին դարձավ լուսանկարիչ Ռոբերտ Բեկի կադրը, որն էլ զարդարեց «Sports Illustrated»-ի շապիկը: Այն 2014 թվականին ընթերցողների քվեարկության արդյունքում ամսագրի բոլոր ժամանակների լավագույն լուսանկարների ցանկում 2-րդն էր:

«Երբ Բրենդին իրացրեց 11-մետրանոցն ու բարձրացրեց շապիկը, գիտեի, բոլորովին արտառոց բան է լինելու: Ես այնպիսի կադր որսացի, որն էլ ոչ ոք չուներ, քանի որ միայն ես էի հենց դարպասի հետեւում կանգնած»,- պատմել է Բեկը:

16 տարի ԱՄՆ-ի հավաքականում հանդես եկած Աշխարհի ու Օլիմպիական խաղերի կրկնակի հաղթող դարձած Չեստեյն այդ պահն այսպես է հիշում. «Այդ պահին միայն մեկ միտք ունեի`սա իմ ֆուտբոլային կարիերայի լավագույն պահն է»:

Հիմա Չեսթեյնը 50 տարեկան է, որոշ ժամանակ նա ֆուտբոլային մեկնաբան է աշխատել, ինչպես նաեւ ընդգրկվել է ամերիկյան ֆուտբոլի Փառքի սրահում: