Մեկ կադրում․ Թեյ բաժանող կանանց զրույցը «Տոտենհեմ»-«Մանչեսթեր Յունայթեդ» խաղի ժամանակ

Ֆուտբոլն Անգլիայում պարզապես խաղ չէ եւ այն դեռ տասնյակ տարիներ առաջ վերածվել է ապրելակերպի։

Պատահական չէ, որ լուսանկարիչները բացի զուտ ֆուտբոլային հանդիպումը նկարելուց, կարողանում են ստանալ հետաքրքիր կադրեր նաեւ դաշտի շուրջ տեղի ունեցողից։ Դրանցից մեկի մասին պատմենք «Մեկ կադրում» շարքի հերթական անդրադարձում։

Այսքան խոսուն ու հագեցած լուսանկարն արվել է 1972 թվականի «Տոտենհեմ»-«Մանչեսթեր Յունայթեդ» խաղի ժամանակ։ «Ուայթ Հարթ Լեյն» ստադիոնի թեյ բաժանող կանայք զրուցում են դաշտից մի քանի քայլ այն կողմ։ Լարված խաղն ընթացքի մեջ է, իսկ նույն պահին երկրպագուների ուշադրությունն ուղղված է բացառապես գնդակի վրա, ովքեր կլանված փորձում են տեսնել, թե ինչ տեղի կունենա հետո։

Երկրպագուները համախոհներ են՝ տղամարդիկ, կանայք, աղջիկներ, տղաներ, բոլորի աչքերը դեպի գնդակն է։ Նրանք անմոռաց ձուլվել են ֆուտբոլին՝ մոռանալով ամեն բան։ Սա իսկական խտացումն է այն բանի, թե ինչ է նշանակում լինել երկրպագու։

Եւ այդ ողջ դրամատիզմն ամբողջացնում են ֆուտբոլի համար աշխատող, բայց այն կարծես չնկատող կանայք։ Նրանց աշխատանքը թեյ բաժանելն է, որն այդքան սիրում են ողջ Մեծ Բրիտանիայում։

Tea lady կամ թեյ բաժանող տիկնայք Միացյալ Թագավորությունում հայտնվել են Երկրորդ համաշխարհային պատերազմի ժամանակ։ Նրանք թեյ էին տալիս գրասենյակներում, գործարաններում, հիվանդանոցներում եւ տարբեր աշխատավայրերում:  Այն դարձել էր կանանց ամենատարածված զբաղմունքներից մեկը եւ բրիտանական մշակույթի մի մասը։

Կարճ ժամանակ անց թեյ բաժանող կանայք հայտնվում են նաեւ ֆուտբոլային ստադիոններում։ Նրանց կարելի էր տեսնել ինչպես ստադիոնի ճաշարանում, այնպես էլ դրա սահմաններից դուրս, երբ տաք թեյով լցված տարան, բլիթներ ու թխվածքներ էին մոտեցնում երկրպագուներին։

Մինչ այսօր էլ Բրիտանիայում այս ավանդույթը կա, սակայն որոշակի փոփոխություններով։ Թեյ սկսել են բաժանել ոչ միայն կանայք, այլ նաեւ տղամարդիկ։ Դրանք երկրպագուները կարող են գնել ստադիոններում հատկացված հատուկ հատվածներում, թեյարաններում։