Մեկ կադրում. Ռոջեր Ֆեդերերի հրաժեշտի խաղն ու արտասվող Ռաֆայել Նադալը

2022 թվականին Աշխարհի ու Եվրոպայի թենիսի հավաքականները Լոնդոնում միմյանց միջեւ 5-րդ հանդիպումն անցկացրին:

20 հազարանոց O2 արենայի տոմսերը համարյա սպառվել էին, իսկ երբ հայտնի դարձավ, որ մրցաշարի ընթացքում կայանալու է Ռոջեր Ֆեդերերի հրաժեշտի խաղը, մնացածի գները հասան մինչեւ 700-800 ֆունտ ստերլինգ:

Mediamax Sport-ի «Մեկ կադրում» շարքում անդրադառնալու ենք Լայվերի Գավաթի հիշարժան դրվագներից մեկին:

Ռոջեր Ֆեդերերի կարիերայի վերջին հանդիպումը Ռաֆայել Նադալի հետ զուգախաղն էր: Խաղից հետո երկրպագուները մոտ 20 րոպե անդադար ծափահարում էին նրան, ինչից հետո շվեյցարացին չկարողացավ զսպել արցունքները:

Այդ հուզիչ պահը նա ցանկացավ կիսել խաղընկերների հետ ու կորտ հրավիրեց նաեւ Եվրոպայի հավաքականի մյուս անդամներին: Բոլորը հուզված էին, բայց ամենից շատ Նադալը, որը չկարողացավ զսպել արցունքները, քանի որ նրա մտերիմ ընկերը եւ սիրելի մրցակիցն ընդմիշտ թողնում էր սպորտը:

«Այնքան ուրախ էի, որ մասնակցեցի սպորտի կուռքերից մեկի հրաժեշտին: Թենիսը թողեց մի մարդ, որը հիացմունքի եւ ոգեշնչման աղբյուր է եղել շատերի համար, այդ թվում՝ ինձ: Չէի ուզում արտասվել, բայց Ֆեդերերն այնքան հուզված էր: Մեր միջեւ ամուր կապ է ստեղծվել, միասին շատ բաներ ենք հաղթահարել եւ առողջ մրցակցություն ունեցել: Նա ինձ միշտ ոգեշնչել է եւ օգնել աճել»,- խոստովանեց Նադալը:

Լուսանկարը` CNN