Եվրոպայի ֆուտբոլի առաջնության մասնակից թիմերը վերջին մարզումներն են անցկացնում՝ պատրաստվելով առաջին հանդիպումներին։
Մենք էլ ֆուտբոլի սիրահարներին շարունակում ենք ծանոթացնել ԵՎՐՈ-2024-ի խմբերի հետ։ Այսօր հերթը D խմբինն է, որտեղ ներառված են Լեհաստանը, Նիդերլանդները, Ավստրիան եւ Ֆրանսիան։
Լեհաստան
Լուսանկարը` Łączy-nas-piłka
Լեհաստանի ընտրանին Եվրոպայի առաջնություններում հանդես է եկել չորս անգամ անընդմեջ, իսկ լավագույն արդյունքը գրանցել է 2016-ին, երբ հասել է 1/4 եզրափակիչ։
Որակավորման փուլում լեհերի գործերն այդքան էլ հաջող չէին ընթանում, ինչի արդյունքում D խմբում գրավեցին ընդամենը 3-րդ տեղը։ Սա հնարավորություն տվեց Լեհաստանին ուղեգրի համար պայքարել լավագույն արդյունք գրանցած մյուս հավաքականների հետ։ Կիսաեզրափակչում նրանք հաղթեցին Էստոնիային, իսկ եզրափակչում՝ Ուելսին։
Արդյունքը եղավ այն, որ Լեհաստանը կրկին ԵՎՐՈ-ում է ու փորձելու է դուրս գալ այս բարդ խմբից։
Նիդերլանդներ
Լուսանկարը` KNVB
Եվրոպայի առաջնություններում 10 անգամ մասնակցած Նիդերլանդների ընտրանին չեմպիոնական տիտղոսը նվաճել է մեկ անգամ՝ 1988 թվականին։
Ռոնալդ Կումանը որպես ֆուտբոլիստ հաղթել է հենց 1988-ի Եվրոպայի առաջնությունում, իսկ այսօր նա արդեն հարազատ թիմի գլխավոր մարզիչն է։ Կումանը Նիդերլանդների ընտրանուն 2019-ին դուրս է բերել Ազգերի Լիգայի եզրափակիչ, իսկ 2023-ին՝ դարձրել բրոնզե մեդալակիր։
Ըստ մասնագետների՝ խումբը Նիդերլանդների համար հաջող է դասավորվել ու պայքարը շարունակելու մեծ հնարավորություն ունի։
Ավստրիա
Լուսանկարը` OEFB
Ավստրիայի հավաքականը Եվրոպայի առաջնության եռակի մասնակից է, իսկ նախորդ ԵՎՐՈ-ի ժամանակ դուրս է եկել 1/8 եզրափակիչ, ինչն էլ վերջինիս լավագույն արդյունքն է։
Ավստրիայի ընտրանին ԵՎՐՈ-2024-ի ուղեգիր ձեռք բերեց Ադրբեջանի հավաքականի նկատմամբ տոնած հաղթանակից հետո։ Սա լինելու է ավստրիացիների երրորդ անընդմեջ առաջնությունը, իսկ 2008-ին առաջին անգամ նման իրավունք նրանք նվաճել են որպես ընդունող երկիր (Շվեյցարիայի հետ համատեղ, խմբ․)։
Ավստրիացիների թիմը գլխավորում է գերմանացի Ռալֆ Ռանգնիկը, որի թիմի հիմնական կորիզը ներկայացնում է գերմանական Բունդեսլիգան։
Ֆրանսիա
Լուսանկարը` Équipe de France de Football
Այս խմբի ամենատիտղոսակիր հավաքականը Ֆրանսիան է։ Եվրոպայի առաջնություններում ֆրանսիացիները մինչ այս հանդես են եկել 11 անգամ՝ երկու անգամ դառնալով չեմպիոններ։ Առաջին հաջողությանը Ֆրանսիան Եվրոպայում հասել է 1984-ին, ապա 2000-ին։
1988 թվականից այս կողմ Ֆրանսիան մրցաշարը երբեք բաց չի թողել։ ԵՎՐՈ-2016-ին կապույտները շատ մոտ էին ԵԱ-ի եռակի չեմպիոն դառնալուն, սակայն եզրափակչում Դիդյե Դեշամի թիմը պարտվեց Պորտուգալիային։
Դեշամը շատ լավ գիտի չեմպիոնության գինը (նա թիմի կազմում ԵԱ-ի չեմպիոն հռչակվել է 2000-ին) եւ 2012-ից գլխավորելով թիմը՝ բավական հաջողությունների է հասել ու դարձել նաեւ Աշխարհի չեմպիոն, Ազգերի Լիգայի հաղթող։ Այժմ նա ձգտելու է բավական ուժեղ կազմի հետ կատարել եւս մեկ երազանք՝ դառնալով Եվրոպայի չեմպիոն նաեւ որպես մարզիչ։
Առաջին խաղերում հունիսի 16-ին կմրցեն Լեհաստան-Նիդերլանդներ, իսկ հունիսի 17-ին՝ Ավստրիա-Ֆրանսիա զույգերը։
ԵՎՐՈ-2024․ A խումբ
ԵՎՐՈ-2024․ В խումբ
ԵՎՐՈ-2024․ С խումբ
Գոհար Նալբանդյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: