Հպարտանալու 2 առիթ մեկ երեկոյի ընթացքում. Իսկական չեմպիոնը

«Երբ գյումրեցի մի սովորական տղա դառնում է Աշխարհի կրկնակի չեմպիոն, ողջ ազգն է միավորվում»:

Դեռ անցած տարի Աշխարհի առաջնությունում հաղթելուց հետո Գարեգին Նժդեհի ամենահայտնի մտքերից մեկով ոգեշնչված այսպես էինք գրել Արթուր Ալեքսանյանի մասին:

Այսօր նա 24 տարեկանում արդեն Օլիմպիական չեմպիոն է, լավագույնը, անկրկնելին ու միակը:

Արթուրի ֆենոմենը սակայն պարզապես ուժեղագույնն ու անպարտելին լինելու մեջ չէ, նրա մարդկային որակներն ու հայրենասիրությունը շատ ավելի խոսուն են ու հուզիչ:

Լուսանկարը` Մեդիամաքս

Մեկ երեկոյի ընթացքում նա իրենով հիանալու ու հպարտանալու 2 առիթ տվեց: Վերջապես 20 տարի անց Հայաստանը կրկին կարողացավ իր խոսքն ասել Օլիմպիական խաղերում: 1996-ի Ատլանտայի Օլիմպիադայից հետո հայ մարզիկները մեդալներ նվաճել էին, սակայն առաջին անգամ այդքան երկար ընդմիջումից հետո խաղերում կրկին լսվեց մեր օրհներգը:

Օգոստոսի 16-ին Ռիոյում, սակայն «Մեր հայրենիքը» պարզապես չհնչեց, այն ասես ուղերձ լիներ ամբողջ աշխարհին մեր ուժի, մեր անկոտրուն կամքի ու բնավորության մասին:

Այն հնչում էր Արթուր Ալեքսանյանի պատվին, բայց Կարիոկա-2-ում ներկա յուրաքանչյուր հայ այդ հաղթանակը նաեւ իրենն էր համարում:

Պատվոհարթակին կանգնած ըմբիշի զարկերին հավասար նաեւ մեր սրտերն էին բաբախում: Գիտեինք, որ օվկիանոսից այն կողմ նույն ապրումներոն ունեն նաեւ մեր հայրենակիցները, որոնք ամբողջ գիշեր արթուն էին մնացել այդ անմոռանալի պահերը վայելելու համար:

Լուսանկարը` Մեդիամաքս

Արթուրը բազմաթիվ անգամներ է ապացուցել, որ սովորական մարզիկ չէ, ու հաղթանակն էլ այլ կերպ պետք է նշանավորեր: Նա շատ օլիմպիական չեմպիոնների պես չպարեց, խելագարության աստիճանի չգոռաց կամ էլ իր հասցեին գովասանքի խոսքեր չասաց:

Ամեն ինչ շատ զուսպ էր ու համեստ: Օլիմպիական չեմպիոնն ապրիլյան քառօրյա պատերազմի ժամանակ զոհված 19-ամյա կրտսեր սերժանտ Ռոբերտ Աբաջյանի լուսանկարով շապիկով էր…

Քչախոս ու սովորաբար հարցազրույցներից խուսափող մարզիկն այս անգամ էլ առանց բառերի շատ ավելի մեծ գործ արեց ու մտածելու առիթ տվեց բոլորին: Նա հերոսին վայել կերպով մեծարեց հերոսին:

Լուսանկարը` Մեդիամաքս

Հաշված րոպեների ընթացքում լուսանկարը տարածվեց ամբողջ աշխարհով, առաջատար բազմաթիվ լրատվամիջոցներ գրեցին այդ մասին:

Այդկերպ մեր շիկահեր ըմբիշն իր հարգանքի տուրքը մատուցեց «կյաժին» ու այն բոլոր զինվորներին, ովքեր հերոսաբար ընկել են մեր հայրենիքը պաշտպանելիս: Այդ հաղթանակը նաեւ բոլոր զինվորների պատվին է, ովքեր հիմա էլ իրականացնում են այդ դժվար ու կարեւոր առաքելությունը՝ հայրենիքի պաշտպանությունը:

Գոհար Նալբանդյան, Հասմիկ Բաբայան

Նախագծի գործընկեր