Եվրոպայի առաջնություններ ու երեւանյան մրցաշարեր․ Ապրիլը հագեցած է լինելու

Ապրիլին հայ մարզիկներին հագեցած ու մրցումներով հարուստ օրեր են սպասվում։ Տարբեր մարզաձեւերից նրանք մասնակցելու են մի շարք կարեւոր մրցաշարերի։

Նախ պայքարի են դուրս գալու ըմբիշները։ Եվրոպայի առաջնությունն այս տարի ընդունելու է Բրատիսլավան։ Ապրիլի 7-9-ը ելույթ են ունենալու ազատ ոճի ըմբիշները, իսկ 11-13-ը գորգը տրամադրվելու է հունահռոմեականներին։

Ապրիլի 10-13-ը խորվաթական Օսիյեկում կկայանա մարմնամարզության Աշխարհի գավաթի 4-րդ փուլը։ Հայաստանի ընտրանին եւս մասնակցելու է այս մրցմանը։

Ապրիլի 12-20-ը հոկեյի սիրահարները կարող են Հայաստանի հավաքականի ելույթներին հետեւել Երեւանում։ Աշխարհի 4-րդ դիվիզիոնի առաջնությունն ընդունելու է մեր երկիրը։ Հայաստանի ընտրանին մրցելու է Իրանի, Քուվեյթի, Մալայզիայի, Ինդոնեզիայի եւ Ուզբեկստանի հավաքականների հետ:

Ծանրորդները Եվրոպայի առաջնության մեդալների համար պայքարելու են ապրիլի 13-21-ը։  Մրցումներն ընդունելու է Քիշնեւը։ Հայաստանը ներկայանալու է մեծաքանակ թիմով։ Կանայք հանդես կգան 10 մասնակցով, տղամարդիկ եւս ներկայացվել են 10 ծանրորդով։

Երեւանյան երկրորդ միջազգային մրցաշարը կլինի բռնցքամարտից։ Ապրիլի 14-20-ը բռնցքամարտիկները կանցկացնեն մենամարտերը։ Հայաստանի ընտրանու համար սա կլինի նախապատրաստական փուլ Աշխարհի առաջնությունից առաջ։ Հավաքականի գլխավոր մարզիչ Ռուդիկ Մկրտչյանը դեռ մասնակիցների անունները չի հրապարակել։