Վաղը «Դինամո» մարզադահլիճում «Ռյազանի» հետ խաղով հայկական բասկետբոլային «Ուրարտու» ակումբը մեկնարկելու է Ռուսաստանի Սուպերլիգա 1-ի խաղարկությունում:
Լրագրողների հետ հանդիպման ժամանակ թիմի գլխավոր մարզիչ Տիգրան Գյոկչյանն ասել է, որ «Ուրարտուն» դեռ 100 տոկոսով պատրաստ չէ, բայց վերջերս Թբիլիսիում անցկացրած ընկերական բոլոր հանդիպումներում էլ հաղթանակներ է գրանցել իր հաշվին:
«Այնտեղ ցույց տվեցինք, որ մարտունակ ու հետաքրքիր թիմ ենք ստեղծել, ամեն ինչ պետք է լավ ընթանա: Նախապատրաստական փուլերը հստակ չեն եղել, մի քիչ լեգիոներներն ուշացան, բայց ամռանը տղաները ֆիզիկական պատրաստվածության վրա լավ են աշխատել: Ինձ մնում է տակտիկական ու տեխնիկական հարցերը լուծել»,- ասել է մարզիչը:
Թիմը համալրել են 3 ամերիկացի բասկետբոլիստներ, որոնցից մեկը՝ Տոդ Օ’Բրայանը, Հայաստանի քաղաքացիություն ստանալու է ու հանդես է գալու նաեւ հավաքականի կազմում.
«Ուրարտու» ակումբի ստեղծումը Գյոկչյանն արդեն իսկ մեծ հաջողություն է համարում, նա նշում է, որ իրենց առաջնային նպատակը Հայաստանում բասկետբոլը զարգացնելն է: «Թիմը ես համեմատում եմ ձնագնդիկի հետ: Հիմա այն դեռ փոքր է, բայց աստիճանաբար նոր խաղացողներ, հովանավորներ ու երկրպագուներ է ձեռք բերում ու մեծանում»:
Նա ընդգծում է, որ իրենց բարդ մրցակիցներ ու դժվար հանդիպումներ են սպասվում ու կարեւոր է լինելու յուրաքանչյուր խաղը:
«Ուրարտուի» ավագ Ամիրան Ամիրխանովն էլ հույս ունի, որ վաղն իրենց մեծ թվով երկրպագուներ են աջակցելու:
«Մեզ տնային խաղեր են սպասվում, շատ կարեւոր կլինի ցույց տալ, թե ինչի ենք ընդունակ: Ես հանդես եմ եկել Ռուսաստանում, բոլոր մրցակից թիմերին էլ գիտեմ, նրանք բավականին ուժեղ են»,- ավելացրել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: