«Գալաքսի» ընկերությունների խմբի կողմից կազմակերպվող ֆուտզալի Չեմպիոնների լիգա մրցաշարը արդեն ավանդույթ է դառնում։ Այս տարի մասնակցում են Խմբի կազմում հանդես եկող ընկերությունների 8 թիմեր՝ իրենց 79 մասնակիցներով:
Այս տարի մրցաշարում ուժերն են փորձելու «MegaFood», «TI’ME Armenia», «TI’ME Georgia», «Yerevan Mall», «SantaFe», «Ucom», «Ucom Glory» եւ «Galaxy» թիմերը:
Mediamax Sport-ը ներկա է եղել մրցաշարի բացմանն ու զրուցել կազմակերպիչների եւ թիմերի ներկայացուցիչների հետ:
Վահան Դիլանյան («Գալաքսի» ընկերությունների խմբի Հաղորդակցության տնօրեն)
«Երկրորդ տարին է, որ անցկացնում ենք ֆուտզալի մրցաշար՝ նախաձեռնված «Գալաքսի» ընկերությունների խմբի համահիմնադիրների կողմից։ Մասնակցում են «Գալաքսիի» կազմում հանդես եկող ընկերություննները։
Ի դեպ, այս տարի մրցաշարը, կարելի է ասել, ստացել է միջազգային «արձագանք». մասնակցում է նաեւ TI’ME Վրաստանի թիմը. հուսով ենք, որ հաջորդ տարի կմասնակցի նաեւ Բելառուսի թիմը»։
Լուսանկարը` Մեդիամաքս
Ազատ Պետրոսյան («Գալաքսի» Չեմպիոնների լիգա ֆուտզալի 2022 ծրագրի ղեկավար)
«Մեր ֆուտբոլիստները մարզվել են անհատական ծրագրով՝ ելնելով ժամանակի սղությունից, բայց խորհրդակցելով մարզիչների հետ: Այս մրցաշարն իրականում եւս մեկ աշխատանք է՝ մեր բուն աշխատանքին զուգահեռ՝ պարզապես մեկ այլ հարթության մեջ. այն նույնպես պահանջում է ջանք, եռանդ, նպատակ, աշխատասիրություն նվիրվածություն եւ թիմային ոգի»:
Թիմերի ավագները բարձր են գնահատում առողջ ապրելակերպին ուղղված ցանկացած նախաձեռնություն՝ կարեւորելով նմանատիպ միջոցառումների անցկացումը՝ «Գալաքսիի» խմբի ներսում։
Լուսանկարը` Մեդիամաքս
Գաբրիել Ավետիսյան («Գալաքսի» Չեմպիոնների լիգա ֆուտզալի 2022 մրցաշարի կազմկոմիտեի ղեկավար, «Galaxy» թիմի ավագ)
Առողջությունից ու սպորտային պայքարից բացի, «Գալաքսիի» կազմակերպած այս մրցաշարը հնարավորություն է տալիս շփվել կոլեկտիվի անդամների հետ, որոնց հետ աշխատում ես, բայց լավ չես ճանաչում:
Լավ մթնոլորտը նպաստում է մտերմացմանն ու հետագայում օգնում արդեն աշխատանքի ընթացքում:
Անցած տարի դուրս եկանք եզրափակիչ, բայց պարտություն կրեցինք: Մենք այն ժամանակ մարզիչ չունեինք ու որոշեցինք, որ պետք է պրոֆեսիոնալ մարզչի հետ աշխատենք: Մարզումներ ենք անցկացրել, ֆիզիկապես ավելի ամրացել ու մարզչի առաջարկած ծրագրով ենք առաջ շարժվում:
Լուսանկարը` Մեդիամաքս
Առաջին խաղերն արդեն կայացել են, հետեւել եմ մրցակիցներին ու կարող եմ ասել, որ մեր շանսերը մեծ են: Չնայած դեռ սկիզբն է ու լարվածություն կա, մի քանի խաղ հետո արդեն թիմերն ավելի կբացվեն:
Արտյոմ Խլղաթյան (Ucom թիմի ավագ)
Մենք մրցաշարի գործող չեմպիոնն ենք: Այս տիտղոսն անցած տարի նվաճեցինք, քանի որ իրար լավ ճանաչում ենք, թիմային ենք գործում: Հույս ունենք, որ կկարողանանք կրկնակի չեմպիոն դառնալ:
Թիմի կազմում չորս հոգու փոփոխություն է եղել: Միասին մարզվում ենք, շաբաթը մեկ անգամ պարտադիր հավաքվում ենք ու խաղում: Այնպես որ, լավ մարզավիճակով ենք մոտեցել մրցաշարին:
Բոլորս էլ ժամանակին ֆուտբոլ ենք խաղացել, տղաներից մեկը մինչեւ այսօր էլ պրոֆեսիոնալ պարապում է:
Նման մրցաշարերը համախմբում են, պայքարելու ոգին է ավելանում: Բացի այդ էլ նստակյաց աշխատանքից հետո սպորտը շատ է օգնում:
Լուսանկարը` Մեդիամաքս
Էդգար Մելքոնյան («MegaFood»-ի ավագ)
Հաճելի է այս մրցաշարին մասնակցել, 2-րդ տարին ենք խաղալու ու շատ լավ ենք տրամադրված: 2-3 ամիս աշխատանքին զուգահեռ մարզվել ենք, լավ պատրաստված ենք, մնացածը մրցաշարը ցույց կտա: Բոլորին հաջողություն եմ մաղթում, թող հաղթի ուժեղագույնը, մենք էլ տրամադրված ենք 1-ին տեղը գրավել:
Նախորդ տարի շատ լավ տպավորություններ ենք ստացել, հիմա փորձել ենք մեր սխալներն ուղղել ու ավելի լավ կազմով մասնակցել: Կցանկանամ, որ նման սպորտային մրցաշարեր հաճախակի լինեն:
Սպորտն իմ կյանքում առաջնային դեր ունի, ես ֆուտբոլ եմ խաղացել «Բանանց» ակումբում, բայց բանակից վերադառնալուց հետո չեմ շարունակել մարզվել:
Լուսանկարը` Մեդիամաքս
Արթուր Ալմասյան («TI’ME Armenia» թիմի ավագ)
Իրականում շատ կարեւոր միջոցառում է: 2021-ի եզրափակիչ սուլիչից հետո այս մեկին էինք սպասում, որովհետեւ 10-12 օրով բոլորիս կտրում է ամենօրյա հոգսերից ու ընկղմվում ենք լարված պայքարի եւ հետաքրքիր ժամանցի մեջ:
Նախորդ տարի մի քիչ անպատրաստ էինք, խմբային փուլից դուրս չեկանք, բայց վստահ եմ, որ հիմա ավելի լավ հանդես կգանք: Հետեւություններ արել ենք, համալրվել ենք հմուտ խաղացողներով: Վստահ ենք, որ մեր պարապմունքները լավ արդյունք են տալու:
Լուսանկարը` Մեդիամաքս
Տիգրան Սողոմոնյան («SantaFe»-ի ավագ)
«SantaFe»-ն նախորդ տարի եւս մասնակցել է «Գալաքսի» ընկերությունների խմբի կազմակերպած մրցաշարին, սակայն ես առաջին անգամ եմ հանդես գալիս: Կազմում ընդգրկել ենք ավելի սպորտային աշխատակիցների: Բոլորս էլ շատ մարտական ենք տրամադրված: Նպատակը հաղթանակն է, ուրիշ բան մենք նույնիսկ չենք էլ քննարկում:
Նմանատիպ միջոցառումները դրական ու հաճելի էներգիա են տալիս, ոգեւորում են, թիմի անդամների միջեւ կապերն ավելի են ամրապնդվում: Բացի այդ, ծանոթանում կամ ավելի ենք մտերմանում այլ կազմակերպությունների աշխատակիցների հետ:
Լուսանկարը` Մեդիամաքս
Հայկ Մանուկյան («Yerevan Mall»-ի թիմի ավագ)
«Yerevan Mall»-ը ներառում է նաեւ «ԿինոՊարկը» եւ «Նավապետ Քիդ գանձերի կղզի» մանկական խաղահրապարակը, դրա համար էլ թիմում ընդգրկված են այս երեք կազմակերպությունների աշխատակազմի անդամներ:
Ամբողջ տարվա ընթացքում փորձում ենք պահպանել սպորտային առույգությունը եւ ժամանակ առ ժամանակ մարզվում ենք: Ունենք խաղացողներ, ովքեր տարբեր սպորտաձեւերով են զբաղվել, հաշվի ենք առել բոլորի խաղային ունակությունները: Թիմի հիմնական կորիզը մնացել է եւ արդեն ավելի փորձառու է, լավ գիտենք մրցակիցներին:
Սպորտային միջոցառումները խորհրդանշական են, հիմքում ավելի շատ ընկերությունն է, քան հաղթանակը: Չնայած սրան, մեր տրամադրվածությունը հաղթական է, հույս ունենք լավ խաղ ցուցադրել ու փորձել գրավել առաջին տեղը:
Լուսանկարը` Մեդիամաքս
Վահագն Հարոյան («Ucom Glory»-ի ավագ)
Մեր նպատակն այս մրցաշարում, իհարկե, ամենաբարձրն է, այլապես չէինք մասնակցի:
Մի քիչ կադրային խնդիրներ ունեինք, վնասվածքով խաղացողներ կան, բայց կարողացանք առաջին խաղում հաղթել: Հույս ունենք, որ կշարունակենք նույն կերպ խաղալ, մեկ հաղթանակն էլ արդեն բավական է խմբից դուրս գալու համար:
Թիմերից մեծ մասին ճանաչում եմ, բայց նոր ծանոթություններ կհաստատենք, հներն էլ կամրապնդենք: Բացի այդ, սպորտով զբաղվելը միշտ դրական է անդրադառնում առողջության վրա:
Լուսանկարը` Մեդիամաքս
Գիորգի Գիունաշվիլի («TI’ME Georgia» թիմի ավագ)
Մեր թիմը Հայաստան է ժամանել Թբիլիսիից: «Գալաքսիի» կազմակերպած մրցաշարին առաջին անգամն ենք մասնակցում, չնայած ես մոտ 5 տարի առաջ գործնական նպատակով եղել եմ Երեւանում:
Թիմում բոլորս էլ աշխատում ենք «TI’ME» Վրաստանում, միասին մարզվում ենք ավելի քան երեք ամիս: Երբ որոշեցինք մասնակցել այս մրցաշարին, հավաքվեցինք ու սկսեցինք մարզումներ անցկացնել:
Շատ ենք աշխատել, պարապել, որպեսզի լավ մարզավիճակ ձեռք բերենք ու կարողանանք հաղթել: Տեսնենք, թե ինչպես կընթանա, արդեն խաղերի ժամանակ կճանաչենք մրցակիցների որակները: Բայց, բնականաբար, մեր թիմն այստեղ է եկել հաղթելու համար:
Լուսանկարը` Մեդիամաքս
«Գալաքսի» Չեմպիոնների լիգա ֆուտզալի մասնակից թիմերը բաժանվել են երկու խմբի եւ պայքարելու են շրջանաձեւ մրցակարգով: Խմբերում առաջին երկու տեղերը զբաղեցրածները մրցելու են ոսկե, արծաթե եւ բրոնզե մեդալների ու հաղթողի կոչման համար, այդ խաղերը նախատեսված են հունիսի 17-ին:
Հասմիկ Բաբայան
Լուսանկարները՝ Էմին Արիստակեսյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: