Օլիմպիական չեմպիոն Կառլոսը Նասարը Նորվեգիայի Ֆյորդե քաղաքում ընթացող ծանրամարտի Աշխարհի առաջնությունում նորից ռեկորդ է սահմանել ու ոսկե մեդալ նվաճել:
21-ամյա ծանրորդը այս անգամ նոր՝ 94 կգ քաշային կարգում է կարողացել Աշխարհի չեմպիոն հռչակվել:
Ի զարմանս բոլորի պոկում վարժությունում ծանրորդը հանդես է եկել սպասվածից վատ ու երկու մոտեցում (178, 182 կգ) չի կարողացել բարձրացնել: Նա գլխավերեւում է պահել 173 կգ-ն ու այդ վարժությունում 4-րդը եղել:
Հրումում նորից տեսել ենք այն Նասարին, որին արդեն սովոր ենք՝ ուժեղ, պայքարող, չհանձնվող ու ռեկորդակիր:
Նա նախ բարձրացրել է 210 կգ, ապա նաեւ 219, ապա համաշխարհային ռեկորդ սահմանել 222-ով: Բուլղարացի ծանրորդի երկամարտի արդյունքը 395 կգ է:
Իրանցի Ալիռեզա Մոեյնին էլ ոչ պակաս կամային որակներ է ցույց տվել ու 391 կգ-ով արծաթե մեդալակիր դարձել՝ Նասարին զիջելով ընդամենը 4 կգ: Նա 182 կգ-ով պոկման առաջատարն էր:
