Լիանա Գյուրջյանը հռչակվեց Եվրոպայի փոխչեմպիոն

Ծանրամարտի Եվրոպայի առաջնության մրցումային հերթական օրն ավարտվել է կանանց մինչեւ 87 կգ քաշայինների պայքարով։

Հայաստանի հավաքականն այստեղ ուներ երկու ներկայացուցիչ։ Տաթեւ Հակոբյանն ու Լիանա Գյուրջյանը հաջող են մեկնարկել՝ կատարելով բոլոր մոտեցումները։ Հակոբյանը 110 կգ–ով պոկում վարժությունում նվաճել է փոքր արծաթե մեդալ, իսկ Գյուրջյանը 106 կգ–ով զբաղեցրել է 4–րդ տեղը։

Հրումում եւս հայ ծանրորդները արդյունավետ են գործել։ Հակոբյանը բարձրացրել է 122 կգ, իսկ երկամարտի 232 կգ արդյունքով նա զբաղեցրել է 4–րդ հորիզոնականը։

Գյուրջյանն անհամեմատ ուժեղ լինելով հրումից՝ խառնվել է մեդալային պայքարին։ Նա նախ բարձրացրել է 130, ապա՝ 135 ու 140 կգ–ն։ Երկամարտում Գյուրջյանի արդյունքը 246 կգ է, ինչի շնորհիվ նա դարձել է Եվրոպայի փոխչեմպիոն։ Չեմպիոնի կոչումը նվաճել է Սոլֆրիդ Կոանդան (Նորվեգիա)՝ 267 կգ–ով։

Այսօր ավելի վաղ Եվրոպայի չեմպիոնի կոչումը նվաճել էր Գարիկ Կարապետյանը, իսկ Սիմոն Մարտիրոսյանը դարձել էր արծաթե մեդալակիր։