Մայիս 26, 2024
183789 դիտում

Ռոստոմյան. Մեր միակ միտքը Միհրանի մեդալը վերադարձնելն է


Միհրան Հարությունյանը
Միհրան Հարությունյանը

Լուսանկարը` Մեդիամաքս

Հրաչյա Ռոստոմյանը
Հրաչյա Ռոստոմյանը

Լուսանկարը` Մեդիամաքս


Հայաստանի ազգային օլիմպիական կոմիտեի գլխավոր քարտուղար Հրաչյա Ռոստոմյանն այսօր ամփոփել է Ռիոյում կայացած ամառային խաղերի արդյունքները: Հայաստանի հավաքականը վերադարձել է մեկ ոսկե ու երեք արծաթե մեդալներով:

Ռոստոմյանը նշել է, որ մեդալները գոհացնում են ՀԱՕԿ-ին, բայց, բնականաբար, կարող էին ավելին: Նա խոսել է նաեւ բացթողումների ու իրենց վերահսկողությունից դուրս միջադեպերի մասին, ինչպիսին ծանրորդ Անդրանիկ Կարապետյանի վնասվածքն էր:

«Մենք մեծ հույսեր էինք կապում ազատ ոճի ու բռնցքամարտի ընտրանիների հետ,սակայն նրանք չարդարացրին սպասելիքները: Սուբյեկտիվ ու օբյեկտիվ պատճառներ կան: Առաջիկայում մենք այդ հարցերը կքննարկենք ֆեդերացիաների հետ»-, ասել է Ռոստոմյանը:

Սակայն նա գոհ է ծանրամարտի հավաքականի ցույց տված արդյունքից: Ծանրորդներ Գոռ Մինասյանն ու Սիմոն Մարտիրոսյանը դարձել են արծաթե մեդալակիրներ: Ռոստոմյանը համարում է, որ ծանրամարտի թիմն ամենամեծ պոտենցիալ ունեցողներից ու մարտունակներից է, համալրված է երիտասարդ մարզիկներով ու հավակնում է մոտ տարիներին աշխարհում լավագույն հնգյակում ընդգրկվել: 

«Միհրան Հարությունյանի եզրափակիչ գոտեմարտը լկտի ու անբարո ձեւերով դատեցին: Մենամարտի բողոքարկման խնդիրը դժվար էր, քանի որ պասիվությունը սուբյեկտիվ հարց է, մրցավարներն են դա որոշում: Մենք Լոզանի մարզական արբիտրաժային դատարանի հետ ենք աշխատում, փաստաբաններ ենք վարձել, երբ որոշվի թե ինչպես է պետք բողոքարկել, մենք կանենք դա: Չենք հուսահատվում ու աշխատում ենք այդ ուղղությամբ: Մեր միակ միտքը մեդալը վերադարձնելն է»,- ավելացրել է ՀԱՕԿ-ի գլխավոր քարտուղարը:

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:

Մեր ընտրանին