Հունահռոմական ոճի ըմբիշ Մաքսիմ Մանուկյանն անհամբերությամբ է սպասում ամռանը կայանալիք Օլիմպիական խաղերին, որոնք նրա համար առաջինն են լինելու:
Mediamax Sport-ը զրուցել է մարզիկի հետ ու մի քանի բացահայտումներ արել:
-Օլիմպիական ուղեգիրը շատ դժվար պայքարում նվաճեցիր: Որո՞նք էին առաջին մտքերդ այդ հաջողությունից հետո:
-Իսկապես, շատ դժվար պայքար ստացվեց, վաղուց էի սպասել այդ հաջողությանը: Վերջապես կարողացա ապահովել տեղս մեր Օլիմպիական թիմում: Հիմա արդեն մտածում եմ խաղերում մեդալ նվաճելու մասին: Շատ լավ նախապատրաստվում ենք, ու մեծ ակնկալիքներ ունեմ:
-Մաքսիմ, իսկ ինչպե՞ս ես հայտնվել ըմբշամարտի դահլիճում:
- Առաջին քայլերս սկսել եմ կատարել 10 տարեկանում: Եղբայրս էր առաջինը սկսել զբաղվել ըմբշամարտով, ես էլ հետեւեցի նրա օրինակին: Ֆիզիկապես ուժեղ էի, հաղթում էի մրցակիցներիս ու դա ինձ շատ էր դուր գալիս: Սակայն մոտ 9 տարի մարզվելուց հետո հեռացա սպորտից: Պարզապես պարտությունների պատճառով հիասթափվել էի ըմբշամարտից: Ժամանակ անցավ, ավելի հասունացա, շատ բան հասկացա ու վերադարձա:
Լուսանկարը` Մեդիամաքս
-Իսկ երբ վերադարձար, հավատո՞ւմ էիր, որ մի օր քեզ հաջողվելու է մասնակցել Օլիմպիադայի:
-Բնականաբար, հավատում էի, հենց դրա համար էլ հետ եկա: Շատ մարդկանց գիտեմ, որոնք ասում էին, եթե փոքր տարիքում սպորտը չթողնեին, հաստատ հաջողություններ կգրանցեին: Ես չէի ցանկանում նրանցից մեկը լինել, պետք է ամեն ինչ անել հետո ափսոսանքի պահեր չունենալու համար:
-Իսկ ո՞վ է հայ ըմբիշներից միշտ օրինակ եղել քեզ համար:
-Թիմակիցներս՝ Արթուր Ալեքսանյանն ու Արսեն Ջուլֆալակյանը: Տղաներն իմ ընկերներն են, նրանց հաղթանակները միշտ ուրախացնում են ինձ: Առհասարակ մեր թիմը լավն է ու միասնական, շատ ջերմ հարաբերություններ ունենք, մի կուռ կոլեկտիվ ենք:
-Ո՞ր Օլիմպիական խաղերն են ամենաշատը տպավորել քեզ:
-Լոնդոնի Օլիմպիական խաղերը, որովհետեւ Արթուրն ու Արսենը կարողացան մեդալներ նվաճել: Մինչ այդ Օլիմպիական խաղերն առհասարակ ինձ չէին հետաքրքրում, իսկ 2012-ին արդեն վերադարձել էի սպորտ ու թիմակիցներիս ելույթները մեծ ոգեւորությամբ էի նայում: Հետեւել եմ նաեւ իմ քաշային կարգի մարզիկների պայքարին:
-Եթե բրազիլացի լինեիր, ի՞նչ մարզաձեւով կզբաղվեիր:
-Միեւնույն է ըմբիշ կլինեի (ծիծաղում է):
Լուսանկարը` Մեդիամաքս
-Կարնավալի մասնակցելու դեպքում, ի՞նչ հանդերձանք կկրեիր:
-Ամեն ինչ Օլիմպիական խաղերի արդյունքից է կախված: Բայց հավանաբար սպորտային հանդերձանքով կմասնակցեի, այդպես ավելի հարմար է:
-Երբեւէ նայե՞լ ես բրազիլական սերիալ:
-Պատահել է, հայկական հեռուստաընկերությունները շատ են ցույց տալիս, ու տնեցիները նայելիս իմ աչքով էլ է ընկել:
- Որպես մարզիկ որո՞նք են քո ուժեղ կողմերը:
-Գորգի վրա շատ արագ եմ գործում, դա ինձ միշտ է օգնում:
-Ինչպե՞ս կբնութագրես քեզ:
-Շատ քչախոս եմ ու առհասարակ չեմ սիրում երկար խոսել: Այսօր էլ բացառություն արեցի: Այնպես որ, ձեր բախտը բերել է:
-Շնորհակալ եմ: Մաքսիմ, իսկ ի՞նչ ես ձեռք բերել ու կորցրել սպորտի շնորհիվ:
-Ոչինչ չեմ կորցրել, լավ ընկերներ եմ ձեռք բերել, ճանապարհորդել: Հաճախակի մտածում եմ, ով կլինեի ես, եթե չվերադառնայի սպորտ: Այնպես որ, շատ կարեւոր քայլ եմ արել:
-Եթե այսօր երեկոյան ձեր տուն հյուր գանք, ի՞նչ կպատրաստես մեզ համար:
-Կախված է, թե ինչ եք սիրում: Լավ պատրաստել չեմ կարողանում, բայց հիանալի տեղ գիտեմ, որտեղ հրաշալի խորոված ձուկ են պատրաստում: Կգնանք այնտեղ ուտելու:
Լուսանկարը` Մեդիամաքս
-Ամենագեղեցիկ մարզաձեւն ըստ քեզ:
-Թենիս:
-Քո սիրած հեռուստատեսային հաղորդումը:
-«Կարգին հաղորդումը»: Հաճախակի վերանայում եմ:
-Եվ վերջում ավարտիր նախադասությունները: Փոքր տարիքում երազել եմ….
-Աշխարհի չեմպիոն դառնալ:
-Օլիմպիական խաղերից հետո անպայման….
-հանգստանալու եմ մեկնելու:
-Մարդկանց մեջ ամենաշատը գնահատում եմ…
-անկեղծությունը:
-Ըմբշամարտը պարզապես սպորտ չէ, այն….
-կյանք է:
Մաքսիմ Մանուկյանի հետ զրուցել է Հասմիկ Բաբայանը
Լուսանկարները՝ Էմին Արիստակեսյանի
Նախագծի գործընկեր
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: