Mediamax Sport-ի «Փարիզ-2024» շարքում այս անգամ ծանրորդ Վարազդատ Լալայանն է, որը մեզ հետ շրջել է Գյումրիի կենտրոնում ու հայկական ֆիլմերից հայտնի հատվածներում:
Ծնվել է. 01.05.1999 թ. Գյումրիում:
Ընտանեկան դրությունը. Ամուսնացած չէ:
Մարզաձեւը. Ծանրամարտ (+109 կգ):
Անձնական մարզիչը. Կարեն Կարապետյան:
Հոբբին. Սիրում է ազատ ժամանակն անցկացնել ընկերների հետ:
Կրթությունը. Սովորել է Ֆիզիկական կուլտուրայի հայկական պետական ինստիտուտում:
Ծանրամարտի յուրահատկությունը. Ծանրամարտն իմն է ամեն առումով, դրա համար տանջանքն ու չարչարանքն էլ հոգեհարազատ են:
Կարիերայի ամենատպավորիչ ձեռքբերումը. Երիտասարդների Աշխարհի առաջնությունում հաղթանակն է, քանի որ առաջին անգամ էի միջազգային մրցաշարում նման մեծ արդյունքի հասնում: Կնշեմ նաեւ այս տարի Բուլղարիայում նվաճած Եվրոպայի առաջնության ոսկին: Մինչ այդ ինձ չէր հաջողվել մեծահասակների պայքարում չեմպիոն հռչակվել: Զգացողություններս աննկարագրելի էին, դրանց մասին պատմել չի լինի: Ինձ հիասքանչ էի զգում:
![](https://mediamax.am/datas/znews/middle_/2024/07/1721379101_2720998.jpg)
Լուսանկարը` Մեդիամաքս
Ամենածանր ու անսպասելի պարտությունը. Այդպիսի անհաջողություններ չեմ ունեցել, բոլոր մրցումներում էլ հիմնականում ուժերիս սահմաններում եմ ելույթ ունեցել: Իհարկե, պատահել է, որ ավելի լավ եմ պատրաստ եղել ու ինձ ուժեղ զգացել, բայց չի ստացվել: Սովորաբար նման ելույթների վրա չեմ կենտրոնանում, միշտ առաջ եմ նայում ու աշխատում սխալներս չկրկնել:
Ելույթից առաջ արարողակարգ. Աշխատում եմ կենտրոնանալ եւ ոչ մի բանի մասին չմտածել: Կարողանում եմ տրամադրվել իմ գործին եւ առավելագույնս ճիշտ մոտենալ աշխատանքիս:
1-ին Օլիմպիական խաղերը. Փարիզի խաղերում հրաշքի չեմ սպասում: Ինչպես իմ մյուս մրցումներին եմ պատրաստվել, նույնն էլ հիմա է, պարզապես պատասխանատվությունն է ուրիշ: Բոլոր մրցումներում էլ այն մեծ է, բայց Օլիմպիական խաղերը մարզիկի համար բոլորովին այլ մակարդակի մրցում են համարվում: Շատ լավ եմ մարզվել, իսկ մնացածը կերեւա պայքարի ժամանակ: Խաղեր մեկնելն արդեն իսկ մեծ նվաճում է, շատերն են երազում մասնակցել, իսկ ինձ արդեն իսկ նման հնարավորություն է ընձեռվել: Ուզում եմ լավ ելույթ ունենալ ու ինձ դրսեւորել որպես մեծ մարզիկ:
![](https://mediamax.am/datas/znews/middle_/2024/07/1721379101_7453608.jpg)
Լուսանկարը` Մեդիամաքս
Մոտիվացիան. Մարդկանց ակնկալիքներն ու սպասումներն ինձ չեն մոտիվացնում կամ էլ խանգարում: Նման բաների վրա ընդհանրապես ուշադրություն չեմ դարձնում ու ինձ ծանրաբեռնում, միշտ կենտրոնանում եմ աշխատանքիս վրա: Սովորաբար ինձ մոտիվացնում է տանջանքը, պատկերացնում եմ, թե որքան դժվարությունների ու չարչարանքների միջով եմ անցել, որպեսզի հայտնվեմ այստեղ: Ամիսների թափած քրտինքի արդյունքը ցույց տալու համար մեզ ընդամենը 2 ժամ է տրվում: Հասկանում եմ, որ այդքանից հետո վատ լինել չի կարող, որովհետեւ դժվարն արդեն անցել եմ ու հնարավորություններս դրսեւորելու պահն է: Հենց դա է ինձ վստահություն տալիս ու օգնում մտնել պայքարի մեջ:
Կարգախոսը. Որպես այդպիսին կարգախոս չունեմ, բայց բոլոր մարզիկներն էլ միշտ մտքում կրկնում են, որ չեն կարող հանձնվել, պայքարել ու առաջ գնալ է պետք, կապ չունի, թե ելույթդ ինչպես կստացվի: Մարզիկները պետք է չհանձնվելու հոգեբանություն ունենան, որ կարողանան իրենց աշխատանքին լուրջ մոտենալ, եղածով չբավարարվել ու միշտ ավելին անել:
- Վարազդատ, որո՞նք են քո ուժեղ եւ թույլ կողմերը:
- Բարդ հարց է, բայց կփորձեմ պատասխանել: Կամային եմ, կարող եմ նպատակիս հասնելու համար ինձ ամեն ինչից զրկել ու ոչնչով չգայթակղվել: Իսկ թույլ կողմեր չունեմ:
![](https://mediamax.am/datas/znews/middle_/2024/07/1721379101_7010619.jpg)
Լուսանկարը` Մեդիամաքս
- Վերջերս ունեցած ամենամեծ ուրախությունդ ո՞րն է եղել:
- Մի քանի շաբաթ առաջ մկրտվել եմ Գյումրու Սուրբ Գրիգոր Լուսավորիչ եկեղեցում ու օրինական քրիստոնյա դարձել:
- Ո՞րն է ամենամեծ վախդ:
- Հարազատ կորցնել, դրանից սարսափելի բան չկա:
- Ի՞նչն ես ամենաշատը գնահատում մարդկանց մեջ:
- Նվիրվածությունը:
- Ի՞նչ է երջանկությունը քեզ համար:
- Հիմա երջանիկ եմ, բայց զգացածս լիարժեք բացատրել չեմ կարող:
- Ի՞նչն է քեզ վստահ դարձնում:
- Ինձ շրջապատող մարդիկ:
- Գյումրիում ամենասիրելի ու հարազատ վայրերը:
- Գյումրիի ամեն մի եկեղեցին հարազատ է ինձ: Մեր քաղաքում շատ քիչ վայրեր եմ հաճախում, բայց համարյա բոլոր եկեղեցիներում լինում եմ: Եկեղեցիներում կարողանում եմ հոգեկան հանգստությունս գտնել ու էներգիա ստանալ:
![](https://mediamax.am/datas/znews/middle_/2024/07/1721379101_9288780.jpg)
Լուսանկարը` Մեդիամաքս
- Ինքդ քեզ 3 բառով ինչպե՞ս բնորոշես:
- Բարի, նվիրվող, կամեցող:
- Ամենակարեւոր ձեքբերումը կյանքում:
- Սպորտն է:
- Ամենաշատն ինչի՞ համար ես շնորհակալ:
- Այս կյանքում ամենաշատը ծնողներիցս եմ շնորհակալ՝ ինձ կյանք տալու համար:
- Ովքե՞ր են քո կյանքի կարեւոր մարդիկ:
- Ինձ շրջապատողները, ամեն մեկը յուրովի կարեւոր է ինձ համար:
- Երգ, որը լսում ես քեզ համար յուրահատուկ պահերին:
- Շատ մոտիվացնող երգեր կան, բայց սրտիս դիպչում են Արթուր Մեսչյանի բոլոր կատարումները:
- Տարբերվող իրադարձություն, որ քո կյանքում վերջերս է տեղի ունեցել:
- Ռաֆիկ Հարությունյանի հարսանիքն էր, նա ընկերս լինելուց բացի նաեւ կնքահայրս է: Շատ սպասված հարսանիք էր ու լիարժեք ուրախացել եմ, առհասարակ բոլոր ընկերներիս ուրախություններն էլ լիաթոք վայելում եմ: Նման առիթներին սիրում եմ պարել ու անգամ երգել, մթնոլորտից է կախված, թե ինձ ինչպես կդրսեւորեմ:
- Ի՞նչ է պետք Օլիմպիական խաղեր մեկնելու համար:
- Կամքի ուժ:
![](https://mediamax.am/datas/znews/middle_/2024/07/1721379101_2587265.jpg)
Լուսանկարը` Մեդիամաքս
- Ինչո՞ւ են քո կարծիքով խաղերը 4 տարին մեկ անցկացվում:
- Որպեսզի հասցնենք այդ ժամանակահատվածում մեր մարզավիճակի գագաթնակետին հասնել: Դա մեզ տրված ժամանակն է, որ հղկենք բոլոր թերություններն ու լավագույնս ներկայանանք: 4 տարվա ընթացքում արածը պետք է այդ մեկ օրն արժանիորեն ցույց տանք:
- Ո՞րն է քեզ համար եղել ամենայուրահատուկ ՕԽ-ն:
- Ռիոյինը, քանի որ մեր մարզիկներն այնտեղ առանձնացել են՝ Օլիմպիական չեմպիոն ու մեդալակիրներ ենք ունեցել: Այդ ժամանակ պատանի էի ու մեր հավաքականի հետ պատրաստվում էի Եվրոպայի առաջնությանը: Հավաքականի բոլոր անդամների համար էլ այդ ամենին ականատես լինելը մեծ ուրախություն եւ ոգեւորություն էր: Մեր օլիմպիականների նվաճումներով ոգեշնչված մեկնեցինք Եվրոպայի առաջնություն ու լավ արդյունքներ գրանցեցինք: 2016-ին չէի էլ մտածում, որ մի օր ինքս կմեկնեմ Օլիմպիական խաղեր: Հետագայում, երբ նվաճումների հասա, հասկացա, որ խաղերին մասնակցելու իմ ժամանակն էլ կգա:
- Ի՞նչ ընդհանրություններ ունեն հայերն ու ֆրանսիացիները:
- Հայերի ու ֆրանսիացիների միջեւ նմանություն չեմ տեսնում:
- 3 բան, որ հատուկ է Փարիզին:
- Փարիզում դեռ չեմ եղել, բայց շատ եմ ցանկանում մեկնել: Միայն այն, որ խաղերն անցկացվելու են Փարիզում, ինձ համար առանձնահատուկ են։ Մյուսը Էյֆելյան աշտարակն է, երրորդը կնշեմ, երբ լինեմ այնտեղ:
![](https://mediamax.am/datas/znews/middle_/2024/07/1721379101_6050558.jpg)
Լուսանկարը` Մեդիամաքս
- Քո սիրելի ֆրանսիական ուտելիքը:
- Ռոքֆոր պանիր եմ շատ սիրում:
- Իսկ ֆի՞լմը:
- Թեեւ ֆիլմեր քիչ եմ նայում, բայց կառանձնացնեմ «Տաքսի»-ն:
- Ինչո՞վ են պատմության մեջ հայտնի Հայաստանն ու Ֆրանսիան:
- Հայաստանի պատմության մեջ ինձ համար առանձնանում է Տիգրան Մեծի ժամանակաշրջանը։ Կնշեմ նաեւ իմ անվանակից, Օլիմպիական չեմպիոն Վարազդատին: Իսկ Ֆրանսիայի պատմությանն այնքան էլ լավ ծանոթ չեմ:
- Քո սիրելի Օլիմպիական մեդալակիր կամ չեմպիոն հայ մարզիկները:
- Առանձնացող մարզիկներ կամ կուռքեր չունեմ, քանի որ բոլորին էլ յուրովի եմ հարգում: Ինքս էլ մարզիկ եմ ու գիտեմ, թե որքան ջանք են թափել նման նվաճման հասնելու համար: Բոլոր Օլիմպիական չեմպիոնների արածն էլ սխրանքի է արժանի՝ կապ չունի քանի անգամ են հաղթել: Կամքի ուժ եւ համառություն են ցույց տվել, որ նվաճեն այդ գագաթը: Անգամ խաղերին մասնակցելն արդեն իսկ մեծ ձեռքբերում է:
- Քանի՞ անգամ է Ֆրանսիան ընդունել Օլիմպիական խաղեր:
- Երկու (Ֆրանսիան Օլիմպիական խաղեր է ընդունել 1900 եւ 1924 թթ., խմբ.):
![](https://mediamax.am/datas/znews/middle_/2024/07/1721379101_2490788.jpg)
Լուսանկարը` Մեդիամաքս
- Եթե հնարավորություն ունենայիր, ո՞ր Օլիմպիական խաղերին կմասնակցեիր:
- Երեւի անտիկ խաղերին, քանի որ այն ժամանակ ամեն ինչ ավելի հետաքրքիր է եղել, հետաքրքիր կլիներ տեսնել, թե մրցումների ակունքները որտեղից են գալիս: Ինչու չէ, կուզեի նաեւ Վարազդատ թագավորի հետ նույն Օլիմպիական խաղերում հանդես գալ:
- Քո որակներից որո՞նք կուզեիր էլ ավելի ուժեղացնել:
- Սովորաբար մարզիկներն ինչ էլ անում են, նրանց քիչ է թվում: Բայց ներկա պահին ինչ ունեմ, ինձ բավականացնում է:
- Ինչի՞ց է կազմված հաղթանակը:
- Աշխատասիրությունից եւ ձգտումից:
- Որո՞նք են պարտությունների տված դասերը:
- Սովորաբար անհաջողությունները շատ ավելի դասեր են տալիս, քան հենց բուն հաղթանակները: Քեզ ավելի պայքարող ու ձգտող են դարձնում:
![](https://mediamax.am/datas/znews/middle_/2024/07/1721379101_4503539.jpg)
Լուսանկարը` Մեդիամաքս
- Ինչպիսի՞ն է Հայաստանի Օլիմպիական հավաքականն ու ի՞նչ կմաղթես բոլորիդ:
- Իմ պատկերացմամբ շատ լավ հավաքական ունենք, որը պատրաստ է մեծ նվաճումների: Չնայած նախորդ խաղերի համեմատ քանակապես քիչ ենք, բայց որակապես չենք զիջում: Բոլորիս հաջողություն եմ ցանկանում, թող ամեն մեկը կարողանա ելույթ ունենալ իր հնարավորությունների սահմաններում, առավելագույնս դրսեւորի իրեն ու արժանի պայքար ծավալի, որից առաջին հերթին ինքը գոհ կմնա:
Վարազդատ Լալայանը Եվրոպայի չեմպիոն է, կրկնակի արծաթե ու բրոնզե մեդալակիր
Աշխարհի առաջնությունում նվաճել է 2 արծաթե ու 1 բրոնզե մեդալներ
Վարազդատ Լալայանի հետ զրուցել է Հասմիկ Բաբայանը
Լուսանկարները՝ Ագապե Գրիգորյանի
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: