Հայաստանում ԱՄՆ դեսպանությունը կազմակերպել էր բասկետբոլի 2 լեգենդների՝ Ռուտի Բոլտոնին ու Շարի Սեմիի այցը:
Նրանք Հայաստանում վարել են մի շարք պարապմունքներ եւ ուսումնական ճամբարներ, օգնել բասկետբոլով զբաղվող հայ երիտասարդներին ու մարզիչներին կատարելագործել իրենց խաղային հմտությունները, հայտնում է ԱՄՆ-ի դեսպանատան մամուլի ծառայությունը:
Բոլտոնին ու Սեմին բասկետբոլի կանանց ազգային ասոցիացիայի՝ WNBA-ի խաղացողներ են:
Ռուտի Բոլտոնն ամենաշատ պարգեւների արժանացած կին մարզիկներից մեկն է ՝ նա Օլիմպիական խաղերի կրկնակի ոսկե մեդալակիր է ու 1997-2004 թթ. եղել է Սակրամենտո Մոնարքս թիմի առաջատար խաղացողը: Ծառայել է ԱՄՆ-ի ցամաքային ուժերի պահեստազորում, ունի լեյտենանտի կոչում: Նաեւ հեղինակել է մի շարք գրքեր, որտեղ իր օրինակով փորձում է ոգեշնչել ընթերցողներին:
Շարի Սեմը խաղացել է կանանց լիգայի մի շարք թիմերում ու ԱՄՆ-ի առաջնության հաղթող դարձել: Նա համարվում է WNBA-ի բոլոր ժամանակների աստղ եւ լավագույն խաղացողների հիսունյակում է մի շարք անվանակարգերում:
Հայաստանում գտնվելու ընթացքում նրանք մարզային մի քանի համայնքներում պարապմունքներ են անցկացրել հայ պատանիների ու աղջիկների հետ՝ օգնելով կատարելագործել խաղային հմտությունները: Բասկետբոլիստուհիները նաեւ սովորեցրել են, թե ինչպես կարող են մարզիկները ավելի մոտիվացված լինել, բարձր ինքնագնահատական ունենալ ու առաջնորդ լինել ամենուր:
Բասկետբոլի լեգենդները նաեւ վարպետության դասեր են անցկացրել հայ մարզիչների համար ու ներկայացրել իրենց փորձը, թե ինչպես է կարելի սպորտն օգտագործել ի բարօրություն համայնքի:
Ռուտի Բոլտոնի ու Շարի Սեմի այցը կազմակերպվել է ԱՄՆ դեսպանության կողմից ԱՄՆ պետքարտուղարության Սպորտի դեսպանների ծրագրի շրջանակում, որը հնարավորություն է տալիս ամերիկացի մարզիկներին մեկնել տարբեր երկրներ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: