Երեւան քաղաքի Դավթաշեն համայնքում շարունակում են ընթանալ «Օլիմպավանի» շինարարական աշխատանքները:
Միաժամանակ ընթանում է երեք կառույցների՝ ՀԱՕԿ-ի մասնաշենքի, մարզաբազայի ու մարզիկների համար նախատեսված հյուրանոցի շինարարությունը:
«Օլիմպավանի» նախագծման աշխատանքները սկսվել են 2013 թվականի մարտին, իսկ շինարարությունը մեկնարկել է մայիսի 28-ից:
Մարզաբազայի սպորտային տնօրեն Թաթուլ Հովհաննիսյանը Mediamax Sport-ի թղթակցին ասել է, որ ամեն ինչ ընթանում է նախատեսվածի պես ու, ինչպես եւ պլանավորել էին, «Օլիմպավանը» շահագործման է հանձնվելու նոյեմբերին:
«Արդեն բավականաչափ աշխատանք կատարվել է, հիմա ներքին հարդարումն է ընթանում: Մարզիկները շատ են ոգեւորված, որ իրենց հնարավորություն է ընձեռնվելու մարզվել այդպիսի հիանալի բազայում: Բոլորս անհամբերությամբ ենք սպասում կառույցի շահագործմանը»,- նշել է Հովհաննիսյանը:
Շինարարության 2-րդ փուլում նախատեսվում է կառուցել խաղային մարզաձեւերի դահլիճ ու 2 լողավազան՝ 50 ու 25 մ:
