Մեկ կադրում. Հենրիխ Մխիթարյանի անհավանական գեղեցիկ կարիճ գոլը

Հայաստանի ֆուտբոլի ազգային հավաքականի ավագ ու «Ռոմայի» կիսապաշտպան Հենրիխ Մխիթարյանի կարիերայում անմոռանալի գոլեր շատ են եղել, սակայն մենք առանձնացրել ենք դրանցից ամենագեղեցիկը:

Հայ կիսապաշտպանի հայտնի կարիճ գոլի մասին ենք այսօր պատմելու Mediamax Sport-ի «Մեկ կադրում» շարքում:

2016 թվականի դեկտեմբերին Boxing day-ի շրջանակներում «Մանչեսթեր Յունայթեդը» խաղում էր «Սանդերլենդի» հետ: Հենրիխ Մխիթարյանն այդ խաղում փոխարինման մտավ 62-րդ րոպեին, իսկ 86-ին Զլատան Իբրահիմովիչի փոխանցումից հետո անհավանական գեղեցիկ հարվածով գրավեց մրցակցի դարպասը:

Mkhitaryan with an amazing Scorpion Kick goal! Goal of the season? pic.twitter.com/zKlridRt3V

— Football Cvlture (@FootballCVLTURE) December 26, 2016

Այդ գնդակը Պրեմիեր Լիգայի ու ՄՅՈւ-ի լավագույն գոլը ճանաչվեց: Ահա թե ինչ է դարպասի գրավման մասին ասել Մխիթարյանը.

«Անկեղծ ասած՝ ես էլ էի տպավորված: Միայն տանը կրկին դիտելուց հետո հասկացա, թե ինչպիսի գոլ եմ խփել: Դա իմ կյանքի լավագույն գոլն է: Զլատանի փոխանցումից հետո կարծում էի, որ գնդակը իմ առջեւ կհայտնվի, ոչ թե թիկունքիս: Բայց քանի որ այլ տարբերակ չէր մնում՝ կրունկով հարվածեցի: Գոլից հետո առաջին հերթին նայեցի եզրային մրցավարին, բայց նա խաղից դուրս չարձանագրեց, դրա համար էլ սկսեցի նշել դարպասի գրավումը»:

Գոլը պակաս չի տպավորել նաեւ նրա համահեղինակին՝ Զլատան Իբրահիմովիչին:

«Ուրախ եմ Հենրիխի համար, քանի որ այդ գոլը միշտ հիշվելու է: Ուրախ եմ նաեւ նրա համար, որ իմ մասնակցությունն եմ ունեցել դրանում: Երկրպագուները հիացած էին, քանի որ նման գոլի ականատես դառնալն, իսկապես, զարմանալի է»,- խոստովանել է շվեդ ֆուտբոլիստը:

Իսկ երբ BBC-ն կազմեց 2010 թվականից հետո ամենահիշվող ֆուտբոլային դրվագները, Մխիթարյանի գոլը եւս ընդգրկեց այդ ցանկում:

«Մխիթարյանի կարիերան ՄՅՈւ-ում իրադարձություններով հագեցած չէր, սակայն հայ կիսապաշտպանն ընդմիշտ հիշվել է «Օլդ Թրաֆորդում» խորամանկության շնորհիվ, որը Ժոզե Մոուրինյոն բնութագրել է որպես ֆուտբոլի գեղեցկություն»,- գրել է պարբերականը: