ՄՅՈւ-ն շարունակում է հակառեկորդների շարքը՝ 1-ին անգամ զիջելով 4-րդ դիվիզիոնի թիմին

Համաշխարհային ֆուտբոլային պարբերականները հերթական զարմացական անդրադարձներ են կատարում «Մանչեսթեր Յունայթեդ»-ին։

Այն, որ թիմում արդեն տեւական ժամանակ է խնդիրներ կան, գաղտնիք չէ ոչ ոքի համար։ Չստացված հանդիպումներ, պարտություններ, անհասկանալի հարաբերություններ մարզչական շտաբի, ֆուտբոլիստների ու ղեկավարության միջեւ։ Սրանք կարծես սովորական են դարձել։ Բայց պարտություն Անգլիայի 4-րդ դիվիզիոնը ներկայացնող թիմից այն էլ հենց մեկնարկային խաղում․․․ անսպասելի էր։

Ռուբեն Ամորիմի թիմն Անգլիայի լիգայի գավաթի 2-րդ փուլում մրցել է «Գրիմսբի Թաուն»-ի հետ ու պարտվել հետխաղյա 11-մետրանոցներով։ Հիմնական ժամանակն ավարտվել է 2։2 հաշվով, այն դեպքում, որ Ամորիմի սաները պարտվելիս են եղել 0։2 հաշվով։

«Կարծում եմ հաղթեց այն թիմը, որը խաղադաշտում ավելի ուժեղ էր, նույնիսկ լավագույն խաղացողները կարող են պարտվել։ Իմ կարծիքով թիմը եւ առանձին խաղացողներն իրենց հայտարարությունն արեցին։ Այսքանը։ Մենք պարտվեցինք՝ հաղթեց լավագույն թիմը»,- ասել է Ամորիմը։

Մրցաշարի շրջանակներում սա մանկունիացիների առաջին պարտությունն է 4-րդ դիվիզիոնի թիմից։ Վերջին անգամ թիմը նման վաղ փուլից պայքարը լքել էր 2014-ին, երբ պարտվել էր «Մք Դոնս»-ից։ Իսկ ահա 2023 թվականին Մանչեսթերի թիմը Էրիկ տեն Հագի գլխավորությամբ նվաճել էր Լիգայի գավաթը։

Նոր մեկնարկած մրցաշրջանում ՄՅՈւ-ն անցկացրած երեք խաղում ոչ մի հաղթանակ չի տոնել՝ 1 ոչ-ոքի, 2 պարտություն։