Խորվաթները շարունակում են անպարտելի մնալ. Հայաստանը զիջեց նվազագույն հաշվով

ԵՎՐՈ-2024-ի խմբային փուլում Հայաստանի հավաքականն այսօր Վազգեն Սարգսյանի անվան հանրապետական ստադիոնում հյուրընկալեց Խորվաթիայի ընտրանուն։

Մինչ հանդիպման մեկնարկը տեղի ունեցավ ընտրանու կիսապաշտպան Գեւորգ Ղազարյանի հրաժեշտի արարողությունը, ապա սկսվեց Ալեքսանդր Պետրակովի նշած այս ընտրական մրցաշարի 4 եզրափակիչներից մեկը։

Աշխարհի բրոնզե մեդալակիրների հետ պայքարի մեկնարկում հայ ֆուտբոլիստները բավական լավ տեսք ունեին ու կարողանում էին նաեւ հաջող գրոհներ կազմակերպել, բայց դրանք բավականաչափ սուր չէին ստացվում։ Խորվաթների առաջին գրոհը եղավ 9-րդ րոպեին, երբ Բրունո Պետկովիչը շեղ հարվածեց։ 

Լուսանկարը` Photolure

Աստիճանաբար Զլատկո Դալիչի սաներն ավելի վստահ դարձան, ու 16-րդ րոպեին Լուկա Մոդրիչի անկյունայինից կատարած փոխանցումից հետո հաշիվը բացեց Անդրեյ Կրամարիչը։ Մրցավարը գոլը հաշվեց VAR համակարգով ստուգելուց հետո։ 

Բաց թողած գնդակից հետո Հայաստանի հավաքականը նետվեց գրոհի, սակայն խորվաթների թիմային պաշտպանությունը հաջող էր գործում ու բաց հատվածներ չէր թողնում։ Խորվաթիայի հավաքականը խաղն իր ձեռքը վերցրեց ու անցավ կազմակերպված գրոհների՝ հայ պաշտպաններին պահելով լարվածության մեջ։

Լուսանկարը` Photolure

33-րոպեին հանդիպումը մի քանի րոպեով ընդհատվեց, քանի որ ստադիոնի վրա սավառնում էր Արցախի դրոշը, որին երկրպագուները դիմավորեցին «Արցախ» վանկարկումներով։

Երկրորդ խաղակեսի սկզբնամասում խաղը հիմնականում ընթանում էր Օգնյեն Չանչարեւիչի դարպասի մոտ, խորվաթները հայերին շնչելու ժամանակ չէին տալիս, իսկ նրանց եզակի գրոհներն ընդհատում էին սեփական տուգանայինից բավական հեռու։

Փոխարինման մտած Արթուր Սերոբյանը փորձեց մի քիչ ակտիվություն մտցնել հարձակման գծում, բայց Դոմինիկ Լիվակովիչի համար նրա հարվածը մեծ վտանգ չէր ներկայացնում։ Հայերի կատարմամբ գրոհներ Խորվաթիայի դարպասի մոտ էլի եղան, բայց վերջնական նպատակին հասնել այդպես էլ չստացվեց։ 

Լուսանկարը` Photolure

Խորվաթիայի ընտրանին D խմբում շարունակեց անպարտելի հանդիպումների շարքն ու 10 միավոր վաստակեց՝ հավասարվելով Թուրքիային։ Հայաստանն իր ակտիվում 7 միավոր ունի։