Խորվաթիա-Հայաստան. Ոչ-ոքի Աշխարհի փոխչեմպիոնների հետ

Այսօր Վելիկա Գորիցա քաղաքում կայացավ Խորվաթիայի ու Հայաստանի ֆուտբոլի հավաքականների ընկերական հանդիպումը:

Խորվաթները պատրաստվում են Եվրոպայի առաջնությանը, իսկ Խոակին Կապառոսի համար սա հիանալի հնարավորություն է եղել փորձարկել մի շարք նոր ֆուտբոլիստների:

Հանդիպման մեկնարկից քիչ անց տանտերերն աստիճանաբար կարողացան իրենց ձեռքը վերցնել նախաձեռնությունը, եւ արդեն 11-րդ րոպեին Նիկոլա Վլաշիչին հաջողվեց հարված կատարել դեպի Հայաստանի հավաքականի դարպասը, սակայն հաջող գործեց Դավիթ Յուրչենկոն:

Արդեն 24-րդ րոպեին Լուկա Մոդրիչի փոխանցումից հետո Իվան Պերիշիչը, որն անցկացնում էր իր 100-րդ խաղն ազգային թիմում, դիպուկ հարված կատարեց ու բացեց հանդիպման հաշիվը: Առաջին կեսի ավարտին կրկին հիանալի պահ ստեղծեց Մոդրիչը, սակայն Պերիշիչը չկարողացավ ավարտին հասցնել գրոհը: Իր պահը չօգտագործեց նաեւ Մարիո Պաշալիչը: 

Լուսանկարը` UEFA

Երկրորդ կեսում Կապառոսը կատարեց մի շարք փոփոխություններ՝ խաղադաշտ դուրս բերելով երիտասարդ ֆուտոլիստների: Հենց փոխարինման դուրս եկած ֆուտբոլիստներին էլ հաջողվեց կրճատել հաշվի տարբերությունը: Ժիրայր Շաղոյանի փոխանցումից հետո Վբեյմար Անգուլոն խփեց Հայաստանի ընտրանու պատասխան գնդակը:

Լուսանկարը` Hrvatski nogometni savez