Հայաստանի հավաքականը հաղթել է Իսրայելին եւ դարձել ԵԱ-ի առաջատարը

Հայաստանի շախմատի Մ-18 տ. ընտրանին հերթական հաղթանակն է գրանցել Հռոդոսում, որտեղ կայանում է Եվրոպայի թիմային առաջնությունը:

4-րդ տուրում հայ շախմատիստները 2,5:1,5 հաշվով հաղթել են առաջնությունում ամենաբարձր վարկանիշ ունեցող Իսրայելի թիմին:

Հաղթական միավորներ են վաստակել Էմին Օհանյանը եւ Ռոբերտ Փիլիպոսյանը:

Այս կարեւոր հաջողությունից հետո Հայաստանի հավաքականը 7 միավորով միանձնյա առաջատարն է: 6-ական միավոր ունեն Լեհաստանը, Իսրայելն ու Գերմանիան:

5-րդ խաղափուլում շախմատիստները մրցելու են Լեհաստանի դեմ: