Մոսկվայում ավարտվել է Աերոֆլոտ օփեն շախմատային փառատոնը, որտեղ հանդես էին գալիս նաեւ Հայաստանի ներկայացուցիչները:
B մրցաշարում հաջող է ելույթ ունեցել ու հաղթողի կոչումը նվաճել Տիգրան Հարությունյանը: Նա տարել է 5 հաղթանակ, 4 անգամ ոչ-ոքի խաղացել ու, 9 հնարավորից վաստակելով 7 միավոր, ելույթն ավարտել առաջին հորիզոնականում:
Գլխավոր մրցաշարում հայերից լավագույն արդյունքը ցույց է տվել Մանուել Պետրոսյանը: Նա հավաքել է 6 միավոր ու առաջատարից հետ մնացել ընդամենը կես քայլով: Լրացուցիչ ցուցանիշներով Պետրոսյանը զբաղեցրել է 8-րդ տեղը:
C մրցաշարում 6,5 միավորով 9-րդ հորիզոնականում տեղ է գտել Արթուր Ղարագյոզյանը:
