Աղամալյանը հույս ունի, որ Չալոյանն ՕԽ-ում եւս կկարողանա իրեն լավ դրսեւորել

Հայաստանի բռնցքամարտի հավաքականը 50 օր անց Փարիզում մեկնարկող Օլիմպիական խաղերում ունենալու է մեկ մասնակից։

Դավիթ Չալոյանը +92 կգ քաշային կարգում օրեր առաջ ապահովեց իր մասնակցությունը եւ այժմ արդեն Հայաստանում է։

Mediamax Sport-ի թղթակցի հետ զրույցում հավաքականի գլխավոր մարզիչ Կարեն Աղամալյանն ասել է, որ որոշ ժամանակ հանգստանալուց հետո Չալոյանը կսկսի պատրաստվել խաղերին։

«Որոշ ժամանակ Դավիթը կվերականգնվի, թեթեւ խնդիրներ կան, դրանք կբուժի։ Աշխարհի առաջնությունում արծաթե մեդալ նվաճելուց հետո Չալոյանը երկար ժամանակ չէր կարողանում խոշոր հաջողություններ գրանցել։ Շատ ուրախ եմ, որ հիմա նրան հաջողվեց ուղեգիր նվաճել։ Հույս ունեմ, որ ՕԽ-ում եւս կկարողանա իրեն լավ դրսեւորել, մանավանդ, որ իր քաշային կարգում ամենաքիչ բռնցքամարտիկներն են հայտավորված՝ ընդամենը 16 հոգի»,-ասել է Աղամալյանը։

Մարզիչն ավելացրել է, որ հունիսի վերջից հավաք են անցկացնելու Ծաղկաձորում, բացի Չալոյանից թիմում կընդգրկվեն նաեւ այլ ծանր քաշայիններ։ Բռնցքամարտի թիմն Օլիմպիական խաղերից առաջ վերջին մարզումներն ունենալու է Երեւանում։