«Օլիմպավան». Մինչեւ տարեվերջ պատրաստ կլինի Երեւանի առաջին Օլիմպիական մարզաբազան

Հայաստանում շատ մարզաձեւերի զարգացմանը խոչընդոտող հիմնական պատճառների թվում մշտապես նշվում է մարզադահլիճների ու մարզադպրոցների վատ վիճակը կամ բացակայությունը: Շատ քիչ են նաեւ սպորտային մարզաբազաները, որտեղ հնարավոր է ամբողջովին կազմակերպել մարզիկների ուսումնամարզական հավաքների գործընթացը: Նմանատիպ խոշոր կենտրոններ կան Ծաղկաձորում ու Աբովյանում, սակայն բարձրադիր վայրերում գտնվելու (ճնշումը բարձր է) պատճառով մարզիկներին այնտեղ թույլատրվում է տարեկան անցկացնել ընդամենը 2 հավաք: Այդ պատճառով էլ անհրաժեշտություն առաջացավ սպորտային նմանատիպ կառույց ունենալ Երեւանում:

Տարեվերջին մայրաքաղաքում շահագործման է հանձնվելու նոր մարզաբազա՝ «Օլիմպավանը»: Դավթաշենում գտնվող այդ կառույցը ներառելու է ժամանակակից մարզադահլիճներ, վերականգնողական կենտրոն, հյուրանոցային համալիր ու այն ամենն, ինչ անհրաժեշտ է միայն մարզումների մասին մտածելու համար:

Mediamax Sport-ը զրուցել է ՀԱՕԿ-ի պատասխանատու քարտուղարի, բազայի մարզական տնօրենի, նախագծի հեղինակի հետ ու ներկայացնում է մարզաբազայի մասին մանրամասներ:



«Օլիմպավանի» շինարարությունը մեկնարկել է 2013 թվականի մայիսի 28-ից

Մայրաքաղաքում նոր մարզաբազա կառուցելու մտադրություն Հայաստանի ազգային օլիմպիական կոմիտեն վաղուց ուներ, սակայն վերջնական որոշում կայացվեց 2012 թվականի Լոնդոնի Օլիմպիական խաղերի ավարտից հետո:

ՀԱՕԿ-ի գլխավոր քարտուղար Հրաչյա Ռոստոմյանի խոսքով, խաղերում հայ մարզիկների ելույթներից գոհ էին, սակայն մի շարք բացթողումներ կային: «Մենք տեսանք, որ բազմաթիվ բացեր ունենք, հասկացանք, որ պետք է ունենալ սեփական մարզաբազան, որ մարզումային պրոցեսն ավելի արդյունավետ լինի: Հայաստանում սովորաբար այսպես է արվում՝ մի տեղ մարզվում են, այլ տեղ՝ բուժվում, ամեն ինչ սփռված է, ու թե մարզիչների, թե ադմինիստրատիվ աշխատողների ինտենսիվությունն ու վերահսկողությունը կորչում է»,- նշեց Ռոստոմյանը:

Բազայի մարզական տնօրեն Թաթուլ Հովհաննիսյանի խոսքով էլ, Երեւանում միշտ չէ, որ ստացվում է հավաքներ անցկացնել: Մայրաքաղաքում հիմնականում հնարավոր է լինում մարզվել Ֆուտբոլի ակադեմիայում, սակայն այն տրամադրվում է այն ժամանակ, երբ ազատ է լինում. «Ընդ որում, տրամադրվում է միայն դահլիճը, ու ամեն անգամ գորգերի տեղադրումն ու հավաքումը լրացուցիչ դժվարություններ է առաջացնում: Իսկ Օլիմպիական բազան ամբողջովին լինելու է մեր հավաքականների տրամադրության տակ»:

Մարզաբազայի կառուցման նախապատրաստական աշխատանքները սկսվել են 2012 թվականի վերջից: Ամենակարեւոր ու որոշիչ հարցերից մեկն էլ տարածքի ընտրությունն էր: Առաջնային նպատակներից էր, որ մարզաբազան լինի քաղաքի այն վարչական շրջանում, որտեղ մարզադպրոց չկա, ու ՀԱՕԿ-ի ընտրությունը կանգ առավ Դավթաշեն վարչական շրջանի վրա:

Չնայած «Օլիմպավանը» կառուցվում է հավաքական թիմերի համար, բայց այն նաեւ նպատակ ունի զարգացնել ու մասսայական դարձնել սպորտը պատանիների շրջանում: Այստեղ գործելու է նաեւ մարզադպրոց, որը լինելու է անվճար: Այդ տարածքում բնակվող բոլոր երեխաները հնարավորություն կունենան հաճախել մարզադպրոց ու զբաղվել սպորտով:

«Օլիմպավանի» նախագծման աշխատանքները սկսվել են 2013 թվականի մարտին, իսկ շինարարությունը մեկնարկել է մայիսի 28-ից: Նախագծի հեղինակը Գառնիկ Դանիելյանն է, որի խոսքով, այն ամբողջովին համապատասխանում է ժամանակակից միջազգային սպորտային կառույցներին:



«Մենք կատարել ենք անհրաժեշտ ուսումնասիրություններ, միջազգային փորձն ենք նաեւ հաշվի առել, ու ամեն ինչ արվել է ընդունված նորմաներին համապատասխան: Շինարարությանը զուգահեռ նախագծման աշխատանքները որոշակի փոփոխությունների ենթարկվել են, բայց հիմնական նպատակից չենք շեղվել: Հիմա արդեն վերջին փուլին ենք հասել, արդեն կատարվում է ներքին հարդարումը»,- նշեց Դանիելյանը:

Այս տարվա վերջին պատրաստ կլինեն մարզահամալիրի երեք կառույցներն էլ

«Օլիմպավանի» շինարարության առաջին փուլում, որը շահագործման է հանձնվելու այս տարվա նոյեմբերին, պատրաստ է լինելու երեք կառույց՝ ՀԱՕԿ-ի շենքը, մարզաբազան ու մարզիկների համար նախատեսված հյուրանոցը:

ՀԱՕԿ-ի 4-հարկանի մասնաշենքում լինելու են այդ կառույցի աշխատակիցների ու ֆեդերացիաների գրասենյակներն ու խորհրդակցությունների 2 մեծ դահլիճ:

Մարզաբազայի առաջին հարկում գործելու է ծանրամարտի դահլիճը, հակադոպինգային ու վերականգնողական բժշկական կենտրոնները, ֆիթնեսի դահլիճը եւ հանդերձարանները: Վերականգնողական բժշկական կենտրոնը, Ռոստոմյանի համոզմամբ, բավականին հագեցած է լինելու, ունենալու է ժամանակակից կրեո-սառնարաններ ու բոլոր անհրաժեշտ սարքավորումները: 2-րդ հարկում իրենց մարզումներն են անցկացնելու ըմբիշները, բռնցքամարտիկները, թաեքվանդիստներն ու ձյուդոիստները, որոնք բոլորն էլ առանձին դահլիճներ են ունենալու: 

Մասնագետները նշում են, որ մարզագույքի ձեռքբերման համար ավելի շատ գումար է ծախսվում, քան հենց բուն շինարարության:

Ըստ Հրաչյա Ռոստոմյանի, սպորտային նոր շինության գույքը ձեռք է բերվում պաշտոնական արտադրողներից:

«Օրինակ, աշխարհում լավագույն տատամիներ արտադրում է Ճապոնիան, եւ մենք էլ այնտեղից ենք գնելու: Բուժսարքերն էլ ներկրելու ենք Գերմանիայից: Ցանկանում ենք այնպես անել, որ ամեն ինչ լինի բարձրակարգ ու միայն օգուտ բերի մեր մարզիկներին»,- նշեց Թաթուլ Հովհաննիսյանը:



Մարզիկների համար նախատեսված հյուրանոցը 8 հարկանի է, այն ունենալու է 116 համար, յուրաքանչյուրը՝ 20 ք/մ տարածքով:

«Հյուրանոցի 2 հարկը երկտեղանի է լինելու, մնացածը՝ մեկտեղանի: Երկտեղանի սենյակները հիմնականում նախատեսված են լինելու պատանիների համար: Մեկ հոգու համար նախատեսված համարներն ավելի շատ են լինելու, որպեսզի մարզիկների հանգստին ոչինչ ու ոչ ոք չխանգարի»,- ասաց Թաթուլ Հովհաննիսյանը:

Շինարարության առաջին փուլն այսքանով սահմանափակվելու է, քանի որ ՀԱՕԿ-ը մինչ տարեվերջ նախատեսում է շահագործման հանձնել նաեւ Գյումրիի Օլիմպիական հերթափոխի քոլեջի դահլիճն ու Սիսիանի սպորտդպրոցը: Հրաչյա Ռոստոմյանն ընդգծեց, որ պլանավորում են Գյումրիում մեկ մարզադպրոց էլ վերանորոգել, ու դա հավանաբար կլինի այն դպրոցը, որտեղ մարզվում է Օլիմպիական խաղերի բրոնզե, Աշխարի առաջնության արծաթե մեդալակիր ու Եվրոպայի չեմպիոն Արթուր Ալեքսանյանը:

«Օլիմպավանում» մարզումներ կանցկացնեն ոչ միայն Հայաստանի, այլեւ այլ երկրների հավաքականներ

ՀԱՕԿ-ի գլխավոր քատուղարի խոսքով, «Օլիմպավանի» կառուցումը չի ենթադրում, որ Ծաղկաձորի կամ Աբովյանի մարզաբազաները դուրս են գալու հավաքականների օրացույցից, ու այնտեղ այլեւս մարզումներ չեն լինելու:

«Ծաղկաձորին ոչ մի այլ բազա չի կարող փոխարինել զուտ վերջինիս աշխարհագրական դիրքի պատճառով: Բոլոր թիմերն էլ իրենց ֆիզիկական հավաքն անցկացնում են այնպիսի բարձր վայրում, ինչպիսին Ծաղկաձորն է: Այնպես որ, այնտեղ եւս մեր մարզիկները կշարունակեն անցկացնել պարապմունքներ»,- ասաց Ռոստոմյանը:

«Օլիմպավանում» կմարզվեն ոչ միայն Հայաստանի, այլեւ այլ երկրների հավաքականներ: ՀԱՕԿ-ն արդեն պայմանագիր ունի Բելառուսի օլիմպիական կոմիտեի հետ, պլանավորվում է համատեղ ծրագրեր անցկացնել նաեւ Լատվիայի ու Լիտվայի կոմիտեների հետ:



«Գաղտնիք չէ, որ մարզիկներն ուժեղանում են այն ժամանակ, երբ համատեղ հավաք են անցկացնում: Այժմ էլ կան տարբեր թիմեր, որոնք ժամանում են մեր երկիր ու մարզվում, բայց այսպիսի միջազգային ստանդարտներին համապատասխան կառույց ունենալուց հետո մենք բաց ճակատով կընդունենք նրանց»,- շեշտեց Ռոստոմյանը:

Շինարարության 2-րդ փուլի աշխատանքները կընթանան 2015-2016 թթ-ին 

«Օլիմպավանի» հետ կապված ծրագրերն այդքանով չեն սահմանափակվելու, քանի որ ՀԱՕԿ-ը նոր մարզադահլիճներ կառուցելու ցանկություն ունի:



Ռոստոմյանի հավաստմամբ, իրենք պլանավորում են հողատարածքն ընդարձակել ու նաեւ խաղային մարզաձեւերի համար նախատեսված մարզադահլիճ կառուցել: Նպատակ կա այս ավանում ընդգրկել գիմնաստիկայով ու ակրոբատիկայով զբաղվող մարզիկներին, շինարարության 2-րդ փուլում նախատեսվում է նաեւ լողավազան ու թենիսի կորտեր կառուցել: Այդ աշխատանքները նախատեսված են արդեն 2015-2016թթ. ծրագրում: 

«Այս մարզաբազան շատ կարեւոր դեր է խաղալու մեր մարզիկների համար: Մյուս տարվանից արդեն կամաց-կամաց հայտնի են դառնալու այն մարզիկների անունները, ովքեր մասնակցելու են 2016-ի Օլիմպիական խաղերին: Շատ ենք ցանկանում, որպեսզի Ռիոյում ունենանք Օլիմպիական չեմպիոն, ու այս բազան էլ իր հարմարավետությամբ հաստատ կօգնի մեր օլիմպիականներին»,- ավելացրեց Ռոստոմյանը:

Հասմիկ Բաբայան, Գոհար Նալբանդյան
Լուսանկարները՝ Մարիամ Լորեցյանի