Նորանկախ Հայաստանի պատմության ընթացքում հայաստանցի մարզիկները ձմեռային Օլիմպիական խաղերին առաջին անգամ մասնակցել են 20 տարի առաջ:
Mediamax Sport-ը շարունակում է ներկայացնել «Սոչի-2014»նախագիծը: Այս անգամ ներկայացնելու ենք ձմեռային խաղերում մեր մարզիկների ելույթները:
Այդ տարիների ընթացքում, ցավոք, Հայաստանի ներկայացուցիչներից ոչ մեկին էլ չի հաջողվել անգամ մոտենալ մրցանակային եռյակին:
Հայաստանի հավաքականի նորամուտը ձմեռային խաղերում կայացել է 1994 թվականին Լիլեհամերում (Նորվեգիա): Բոբսլեյի մրցումներում ելույթ են ունեցել Ջո Ալմասյանն ու Քեն Թոփալյանը եւ գրավել են 36-րդ տեղը:
1998-ին Նագանոյի (ճապոնիա) խաղերում Հայաստանի հավաքականի անդամների թիվը հասել է 7-ի: Հայաստանի պատիվը պաշտպանել են լեռնադահուկորդներ Արսեն Հարությունյանը եւ Արմեն Ռաֆայելյանը, դահուկորդ Ալլա Միքայելյանը, իսկ գեղասահքում հայտավորված են եղել Մարիա Կրասիլցեւա-Ալեքսանդր Չեստնիխ ու Քսենիա Սմետանենկո-Սամվել Գյոզալյան զույգերը:
Դրանից 4 տարի անց Սոլթ Լեյք Սիթիի (ԱՄՆ) խաղերում հայ մարզիկների թիվը հասել է 9-ի: Իր 2-րդ Օլիմպիական խաղերին է մասնակցել Արսեն Հարությունյանը: Լեռնադահուկային սպորտում հանդես է եկել նաեւ Վանեսա Ռակեջյանը: 2002-ի Օլիմպիադայում իրենց ուժերը փորձել են նաեւ Յուրգո Ալեքսանդրուն, Դան Ջանջիգյանը (բոբսլեյ), Արամ Հաջյանը, Մարգարիտա Նիկոլյանը (դահուկասպորտ), Յուլիա Լեբեդեւան, Մարիա Կրասիլցեւան-Արտյոմ Զնաչկովը (գեղասահք):
2006-ին Թուրինում (Իտալիա) 3 մարզաձեւում ելույթ են ունեցել Հայաստանի դրոշի տակ հանդես եկող 5 մարզիկներ՝ Աբրահամ Սարախանյան (լեռնադահուկային սպորտ), Էդմոն Խաչատրյան, Հովհաննես Սարգսյան (դահուկասպորտ), Անաստասիա Գրեբյոնկինա-Վազգեն Ազրոյան (գեղասահք):
4 տարի առաջ կայացած վանկուվերյան խաղերում ուժերն են չափել 2 լեռնադահուկորդ եւ 2 դահուկորդ՝ Արսեն Ներսիսյան, Անի-Մաթիլդա Սերեբրակյան, Սերգեյ Միքայելյան եւ Քրիստինե Խաչատրյան:
Սոչիի Օլիմպիադայում նախորդ խաղերի համեմատ մասնակիցների թիվը կրկին չի փոխվել: Սակայն փոքր առաջընթաց հայաստանցի մարզիկներն արձանագրել կարողացել են: Առաջին անգամ Հայաստանի ներկայացուցիչները կմասնակցեն խաղերին նվաճած ուղեգրով: Նման հաջողության հասել ու իր արդեն 2-րդ Օլիմպիադային մասնակցելու է Սերգեյ Միքայելյանը, որն էլ Հայաստանի դրոշակակիրն է լինելու բացման արարողության ժամանակ՝ փետրվարի 7-ին: Հայաստանի Օլիմպիական թիմում են ընդգրկվել նաեւ Արթուր Եղոյանը, Կատյա Գալստյանն ու Արման Սերեբրակյանը:
Պատրաստել է Հասմիկ Բաբայանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: