Ապրիլի 5-ին ծնվել է Հայաստանի ամենահայտնի ու տիտղոսակիր մարզիկներից ու մարզիչներից մեկը` Լեւոն Ջուլֆալակյանը:
Աչքի ընկնելով պատանեկան ու երիտասարդական առաջնություններում՝ 1985-ին Ջուլֆալակյանն ընդգրկվում է ԽՍՀՄ հունահռոմեական ոճի ըմբշամարտի հավաքականում ու հենց այդ տարի էլ հռչակվում Աշխարհի գավաթակիր: Մեկ տարի անց դառնում է Եվրոպայի ու Աշխարհի չեմպիոն:
1988 թվականին Սեուլում կայացած Օլիմպիական խաղերում հռչակվում է ոսկե մեդալակիր: Ի դեպ, Ջուլֆալակյանն առաջին հայ Օլիմպիական չեմպիոնն է հունահռոմեական ոճի ըմբշամարտից: 1989-ին Ջուլֆալակյանն Աշխարհի առաջնությունում նվաճում է բրոնզե մեդալ:
Լուսանկարը` Մեդիամաքս
1998-ի նոյեմբերից մինչեւ 2019-ի օգոստոս նա գլխավորում է Հայաստանի հունահռոմեական ոճի հավաքականը։ 2024-ին Փարիզի Օլիմպիական խաղերի ժամանակ Ըմբշամարտի միջազգային ֆեդերացիան Ջուլֆալակյանին որպես մարզիկ ու մարզիչ իր բացառիկ նվաճումների համար ընդգրկել է Փառքի սրահում։
Հավաքել ենք տարբեր տարիների մտքերը, որոնք Ջուլֆալակյանը հարցազրույցներում հայտնել է Mediamax Sport-ին։
«Չորս տարի պարապել եմ մարմնամարզությամբ։ Արամ Սարգսյանը, որը հետագայում դարձավ իմ անձնական մարզիչը, մարմնամարզության մարզչիս հետ որոշեց, որ ես հաջողություններ կունենամ ըմբշամարտում: Հայրս այս լուրից ոգեւորվեց, իսկ մայրս, որը մարմնամարզուհի էր եղել, նեղվեց: Բնականաբար հորս խոսքը որոշիչ եղավ, ինչի համար ես անչափ ուրախացա: 1977 թվականից սկսեցի հաճախել ըմբշամարտի մարզադպրոց:
Ըմբշամարտով ապրում էի։ Հասկացա, որ այն իմն է: Այդ ժամանակ ես նույնիսկ չէի տարբերում ոճերը եւ խառը գոտեմարտեր էի վարում: Արամ Սարգսյանի օգնությամբ ընտրեցի հունահռոմեական ոճը։
Լուսանկարը` Մեդիամաքս
Շատ դաժան են վնասվածքներն ու ցավերով մարզվելը, մրցումների մասնակցելը։ Բայց ցավին դիմանալն ու կոփված լինելն ինձ սովորեցրել է Արամ Սարգսյանը: Մենք իսկական մարտիկների պես էինք մարզվում՝ ցրտին, առավոտյան 6-ից։ Անկախ ամեն ինչից նա շարունակում էր մեզ աշխատացնել:
Ես երբեք չեմ կասկածել իմ հաղթանակին, գորգ դուրս գալուց առաջ չեմ մտածել պարտության մասին: Իսկ հաղթում էի, որովհետեւ հավատում էի ու պատրաստ էի դրան: Սա եւս մարզչիս շնորհիվ էր:
Միեւնույն ժամանակ հանգիստ եմ ընդունել հաղթանակը, այդ թվում՝ Օլիմպիական չեմպիոն դառնալը: Ամբողջ գիշեր այդպես էլ չկարողացա քնել: Տարօրինակ զգացում է: Ամբողջ կյանքդ ես երազել հասնել այդ բարձրունքին, ամեն ինչ դրել ես դրա համար, տանջվել ես, ու հիմա վերջապես դու Օլիմպիական չեմպիոն ես: Այդ ժամանակ է, որ հպարտություն ու ներքին մեծ բավարարվածություն ես զգում։
Լուսանկարը` Մեդիամաքս
1998-ից առաջարկ ստացա գլխավորել Հայաստանի հավաքականը։ Ընդունեցի այն, բայց նշեցի, որ հաջողությունները միանգամից չեն լինելու։ Կարճ ժամանակ անց իմ սաները սկսեցին մեդալներ նվաճել Եվրոպայի Աշխարհի առաջնություններից, եղան Օլիմպիական մեդալակիրներ։ Հետո տղաներս չեմպիոններ դարձան Եվրոպայում, Աշխարհում, Օլիմպիական խաղերում։ Որպես մարզիկ ու մարզիչ ես ամեն ինչի հասել եմ:
Լավ մարզիչ ու մարզիկ հնարավոր է լինել։ Ես պարզապես չէի կատարում մարզիչներիս հրահանգները, այլ ուսումնասիրում էի, խորանում, ըմբռնում ու վերլուծում ըմբշամարտի հետ կապված ամեն բան:
Որպես մարզիչ ես երբեք չեմ ուշացել ու թույլ չեմ տվել իմ հավաքականից ինչ-որ մեկը ուշանա: Ամեն ինչ օրենքի կիրառումից է սկսվում, իսկ դրա առկայության դեպքում հետեւողական աշխատանքի շնորհիվ ի հայտ է գալիս ցանկալի արդյունքը:
Երջանիկ եմ, որ ընտրել եմ ըմբշամարտը, այն ինձ սովորեցրել է պայքարել: Ըմբշամարտը դպրոց է, որն օգնում է ճիշտ ըմբռնել կյանքը, ճանապարհ հարթել եւ անկախ ամեն դժվարությունից՝ չհանձնվել:
Լուսանկարը` Մեդիամաքս
Իմ երկարատեւ կարիերայի ընթացքում տարատեսակ էմոցիաներ եմ ապրել եւ հպարտացել, որ սաներս կարողացել են հաղթել։ Հպարտ եմ, որ ինձ հաջողվել է բազմաթիվ անգամներ բարձրացրել մեր երկրի դրոշը։
Ես միշտ ձգտում եմ ճիշտ ապրել: Մարդ իր կյանքին հետհայացք գցելուց հետո չպետք է ափսոսա այն տարիները, որոնք այդպես է անցկացրել: Ես գոհ եմ իմ ապրած յուրաքանչյուր օրից, ոչ մի բանի համար չեմ ափսոսում: Միշտ փորձել եմ արժանի զավակ լինել այն երկրին, որն ինձ ծնել է, օգտակար լինել ազգիս, ընտանիքիս, հարազատներիս»:
Գոհար Նալբանդյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: