Հայաստան-Պորտուգալիա. Խմբի առաջատարի ու հետնապահի հանդիպում

Հայաստանի ֆուտբոլի հավաքականը պատրաստվում է հերթական ընտրական հանդիպմանը:

Ի՞նչ կտա Պորտուգալիայի դեմ խաղը, ի՞նչի են ձգտելու հայ ֆուտբոլիստները, ինչպե՞ս կկատարի գլխավոր մարզչի պարտականությունները Սարգիս Հովսեփյանը: Սրանք հարցեր են, որոնց պատասխանները կիմանանք միայն հունիսի 13-ի խաղից հետո:

Բեռնար Շալանդի հեռանալուց հետո Հովսեփյանը նշանակվեց գլխավոր մարզչի պաշտոնակատար: Նա լավ է ճանաչում մեր ազգային թիմը, որովհետեւ երկար տարիներ պաշտպանել է վերջինիս գույները, իսկ ֆուտբոլիստների մեծ մասը ընդամենը մի քանի տարի առաջ նրա հետ խաղում էր կողք կողքի:

Սակայն դեռ պարզ չէ, թե որքանով կկարողանա երկար տարիների ավագն իր ուժերը փորձել որպես գլխավոր մարզիչ, ինչպիսի տեխնիկական ու տակտիկական որոշումներ կկայացնի:

Մինչ այս, Հայաստանի հավաքականը ԵՎՐՈ-2016-ի ընտրական մրցաշարը, մեղմ ասած, ձախողել է: Անցկացրած 4 խաղերից երեքում պարտվել է ու միայն մեկում գրանցել ոչ ոքի հաշիվ: Հայ ֆուտբոլիստները միայն երկու գոլ են խփել ու սեփական դարպասն ընդունել 6 գնդակ:

Ահա այսպիս տխուր վիճակագրությունից հետո էլ Հայաստանի ընտրանին I խմբի հետնապահն է ու, կարելի է ասել, մրցաշարային աղյուսակում բարձր տեղեր զբաղեցնելու հույսեր այլեւս չի փայփայում:

Լուսանկարը` dailymail.co.uk