Ամանորին ընդառաջ. Արթուր Ալեքսանյան

2014 թվականն աստիճանաբար ավարտին է մոտենում: Եկել է ժամանակը, որ մարզիկներն ամփոփեն տարին ու խոսեն ամենամեծ ու կարեւոր նվաճումների մասին:

Mediamax Sport-ի «Ամանորին ընդառաջ» շարքի առաջին մասում ձեզ ենք ներկայացնում 2014 թվականի Աշխարհի ու Եվրոպայի չեմպիոն, Հայաստանի լավագույն մարզիկ, հունահռոմեական ոճի ըմբիշ Արթուր Ալեքսանյանին: 

Հաղթական, ուրախ, անմոռանալի

2014-ն անչափ հաջող էր ինձ համար: Տարվա երկու ամենակարեւոր մրցաշարերից՝ Եվրոպայի ու Աշխարհի առաջնություններից, կարողացա ոսկե մեդալով վերադառնալ: Եվրոպայում իմ 3-րդ անընդմեջ ոսկե մեդալը նվաճեցի, իսկ Աշխարհի առաջնությունում վերջապես հաջողվեց չեմպիոն դառնալ:

Նաեւ առաջին անգամ մասնակցեցի Գերմանիայի ակումբային առաջնությանը: 4 մենամարտ անցկացրի  «Մայց-88» ակումբի կազմում ու բոլորում էլ առավելության հասա: Ինձ շատ դուր եկավ այնտեղ ելույթ ունենալը, հետագայում էլ անպայման կմասնակցեմ:

Աննկարագրելի զգացողություններ եմ ունեցել այս տարի՝ հաղթական, ուրախ, անմոռանալի: Շատ եմ ցանկանում, որ բոլոր հայ մարզիկներն էլ ապրեն հաղթանակի բերկրանքի այդ պահերը:

Տարին ամփոփելիս չեմ կարող սպորտային ձեռքբերումներն առանձնացնել անձնականից: Պրոֆեսիոնալ մարզիկների մոտ դրանք երկուսն էլ միասին են լինում: Ես այս տարի 9 ամիս հավաքներ եմ անցկացրել, անընդհատ մարզվել եմ կամ էլ մրցաշարերի մասնակցել: Այդ պատճառով էլ առաջին պլանում մարզական ձեռքբերումներն են, որոնք շատ մեծ են եղել:

2015-ի մեծ ծրագրերը

2015-ին ամենակարեւորն ինձ համար Օլիմպիական խաղերի ուղեգիր նվաճելն է: Ու, եթե Հայաստանը մասնակցի Բաքվում կայանալիք ամառային Եվրոպական Օլիմպիական խաղերին, անպայման կփորձեմ հաղթել: Ինչպես նաեւ շատ եմ ցանկանում պաշտպանել Աշխարհի չեմպիոնի կոչումն ու կրկնակի հաղթող դառնալ:

Առողջ մաղթանքներ

Շնորհավորում եմ մեր բոլոր հայրենակիցներին, ցանկանում եմ, որ ամենակարեւորն առողջ լինեն: Եթե առողջությունը լինի, ամեն ինչի էլ կկարողանան հասնել:

«Իվան Վասիլեւիչից» մինչեւ «Մեր բակը»

Երբ դեռ փոքր էի, միշտ «Տանը միայնակ» ֆիլմն էի դիտում: Հիմա ինձ Նոր տարվա մասին է հիշեցնում նաեւ «Իվան Վասիլեւիչը փոխում է մասնագիտությունը» ու դե, իհարկե, «Մեր բակը» ֆիլմերը, որոնք մեծ հաճույքով դիտում եմ:





Արթուր Ալեքսանյանի հետ զրուցել է Հասմիկ Բաբայանը