Հունահռոմեական ըմբիշները Ստամբուլում չեն կարողացել Օլիմպիական ուղեգրեր նվաճել

Ստամբուլում մեկնարկած ըմբշամարտի վարկանշային մրցաշարում հայ հունահռոմեականներին չի հաջողվել Օլիմպիական ուղեգրեր նվաճել:

Գեւորգ Ղարիբյանը (60 կգ) հենց մեկնարկային գոտեմարտում 1:8 հաշվով զիջել է կորեացի Կիմ Դահյունին: Գեւորգ Թադեւոսյանը (87 կգ) նախ 10:0 հաշվով գերազանցել է իտալացի Միրկո Մինգուչիին, ապա 4:5 հաշվով պարտվել վրացի Լաշա Գոբաձեին:

Դավիթ Օվասափյանն (130 կգ) էլ մեկնարկում 0:2 հաշվով զիջել է Մանտաս Կնիստաուտասին (Լիտվա):

Հայաստանի հունահռոմեական ընտրանու կազմում Փարիզի Օլիմպիական խաղերին կմասնակցեն Սլավիկ Գալստյանը, Մալխաս Ամոյանն ու Արթուր Ալեքսանյանը:

Վաղվանից Ստամբուլում պայքարի մեջ են մտնելու ազատ ոճայինները: Հայաստանի հավաքականի կազմում մրցավայր են մեկնել Հայկ Պապիկյանը (74 կգ), Մուշեղ Մկրտչյանը (86 կգ), Սերգեյ Սարգսյանն (97 կգ) ու Լյովա Գեւորգյանը (125 կգ):