Հայաստանի ծանրամարտի հավաքականը Բոգոտայում կայացած Աշխարհի առաջնությունում 2 մեդալ է նվաճել:
Սամվել Գասպարյանն (102 կգ) ու Վարազդատ Լալայանը (+109 կգ) դարձել են բրոնզե մեդալակիրներ: Mediamax Sport-ի հետ հավաքականի ելույթներն ամփոփել է ծանրամարտի ֆեդերացիայի նախագահ Հրաչյա Ռոստոմյանը:
«Աշխարհի առաջնությունում հանդես ենք եկել 5 Օլիմպիական քաշային կարգերից երեքում ու երկուսում մեդալ նվաճել, ինչը լավ արդյունք է: Վարազդատ Լալայանը պատրաստ էր անգամ չեմպիոնության, սակայն շփոթվեց ու չէր հավատում, որ կարող է հաղթել Լաշա Տալախաձեին: Բայց նրա բարձրացրած կիլոգրամները հույս են տալիս, որ հետագայում էլ ավելի լավ է ելույթ ունենալու:
Լալայանը պետք է մինչեւ 2024-ի խաղերը ամեն վարժությունում 5-ական կիլոգրամ ավելացնի ու համոզված եմ, որ 2 տարվա ընթացքում հսկայական աճ կարձանագրի: Լալայանը քրտնաջան աշխատում է ու անընդհատ ավելացնում երկամարտի իր արդյունքը:
Լուսանկարը` EW FED
Մինչ առաջնությունն էլ նշել էի, որ Սիմոն Մարտիրոսյանն այս անգամ ուղղակի մասնակցելու է, որպեսզի կարողանա պայքարել Օլիմպիական միավորների համար: Նրա պոտենցիալը գիտեն ոչ միայն Հայաստանում, այլ նաեւ ողջ ծանրամարտի աշխարհում: Սիմոնը եւս հետագայում դեռ ցույց կտա, թե ինչի է ընդունակ:
Ինչ վերաբերվում է տղամարդկանց ընտրանու գլխավոր մարզիչ Փաշիկ Ալավերդյանի այն հայտարարությանը, թե պատրաստ է հեռանալ, ֆեդերացիայի օրակարգում նման հարց չկա ու չենք էլ քննարկելու: Նրան հունից հանել են տարբեր խոսակցություններ, բայց մենք չենք պատրաստվում մարզչի փոփոխություն կատարել: Միայն Ալավերդյանի հեռանալու ցանկությունը քիչ է:
Կանանց հավաքականի հետ կապված վերապահումներ են եղել օբյեկտիվ եւ սուբյեկտիվ պատճառներով: Մի շրջան կար, որ մոտ 10 տարվա ընթացքում սերունդների միջեւ կապը կտրվեց: Ի տարբերություն տղամարդկանց, ովքեր բոլոր տարիքային թիմերում մեդալներ էին նվաճում, կանանց մոտ սերնդափոխությունը խախտվեց:
Լուսանկարը` Անձնական արխիվից
Հռիփսիմե Խուրշուդյանից ու Նազիկ Ավդալյանից հետո մի քանի տարի կանանց ծանրամարտը կորավ, հիմա նորից պատանեկան ու երիտասարդական տարիքային խմբերում նվաճումներ ունենք: Այսօր դեռ այդ ցիկլի մեջ չենք, բայց ժամանակի ընթացքում ամեն ինչ հունի մեջ կընկնի:
Բավական ուժեղ մարզուհի ունենք՝ Լիանա Գյուրջյանը պատանիների ու երիտասարդների պայքարում հնարավոր մեդալները նվաճել է, ժամանակ է պետք, որ մեծահասակների թիմում էլ հաստատվի: Նախատեսում ենք, որ Փարիզում 2-3 կին ծանրորդ կունենանք:
Հիմա ծանրամարտի ֆեդերացիայի առաջնային խնդիրը 2024-ի ապրիլին Երեւանում կայանալիք Եվրոպայի առաջնությանը նախապատրաստվելն ու այն բարձր մակարդակով կազմակերպելն է»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: