Հայաստանի Օլիմպիական հավաքականին հերթական ուղեգիրը պարգեւել է բռնցքամարտիկ Արթուր Հովհաննիսյանը:
Mediamax Sport-ն այս անգամ հյուրընկալել է մեր 20-ամյա մարզիկին:
- Գյումրին սպորտային քաղաք է: Որպես գյումրեցի, կարո՞ղ ես ասել, թե որն է գաղտնիքը:
- Բացի տրամադրվածությունից ու ձգտումից, երեւի մեզ օգնում են նաեւ Գյումրիի կլիմայական պայմանները: Մեր քաղաքի մարզիկներն անընդհատ պայքարում են, կռվում մինչեւ վերջ:
- Ի՞նչն է քեզ տարել բռնցքամարտ:
- Ես հունահռոմեական ոճի ըմբշամարտի էի գնում: 11 տարեկան էի, երբ հյուրընկալել էինք մեր բարեկամ Մանվել Գաբրիելյանին, որը հետագայում դարձավ մարզիչս: Ասաց, որ գնամ իրենց մարզումներին, բայց չցանկացա: Մի անգամ էլ եղբորս հետ որոշեցինք գնալ, նայեցինք, հավանեցիք ու սկսեցինք մարզվել: Հետո եղբայրս թողեց բռնցքամարտը, իսկ ես էլ ավելի խորացա: Բացի այդ էլ, հայրիկս որոշ ժամանակ զբաղել է բռնցքամարտով, ու ես մի տեսակ շարունակում եմ նրա կիսատ թողած գործը:
- Ինչպե՞ս ես կարողանում հաղթահարել դժվարությունները:
- Անընդհատ աշխատելով: Միշտ փորձում եմ ուղղել սխալներս: Հայրիկս է օգնում, հատկապես, երբ պարտություններ եմ ունենում: Նա միշտ ինձ քաջալերում է, ասում, որ պետք է պայքարեմ:
- Բռնցքամարտում ի՞նչը չես սիրում:
- Մրցավարների կողմից թույլ տված անարդարությունը:
- Ի՞նչ պետք է ունենա երիտասարդը, որպեսզի կարողանա հաջողություն գրանցել բռնցքամարտում:
- Կամքի ուժ եւ աշխատասիրություն:
Արթուր ՀովհաննիսյանըԼուսանկարը` Մեդիամաքս
- Դու ընդամենը 20 տարեկան ես: Սպասո՞ւմ էիր, որ կկարողանաս Օլիմպիական ուղեգիր նվաճել:
- Ընդամենը մի քանի տարի առաջ սա ուղղակի երազանք էր: Բայց Թուրքիա գնալուց առաջ շատ լուրջ էի պատրաստվել ու մեկնել էի միայն հաղթելու համար: Շատերը չէին հավատում մեր թիմին, սակայն մենք գիտեինք, որ այնտեղից անպայման վարկանիշներ ենք բերելու:
- Փորձենք գնալ Ռիո: Առաջին անգման ես մասնակցելու Օլիմպիական խաղերին: Ինչպե՞ս ես տրամադրվում:
- Հիմա ես միայն կիսով չափ եմ հասել նպատակիս՝ ունեմ ուղեգիր: Բայց ամբողջական տեսք ստանալու համար պետք է մեդալ նվաճեմ: Ամեն ինչ պետք է անեմ, որ իրականացնեմ երազանքս:
- Ի՞նչ են Օլիմպիական խաղերը քեզ համար:
- 2008 թվականին, երբ նոր էի սկսել պարապել, տեղի ունեցան Պեկինի Օլիմպիական խաղերը: Ես հետեւում էի մեր բռնցքամարտիկների, հատկապես Անդրանիկ Հակոբյանի ելույթներին: Այդ ժամանակից էլ ինձ համար եւս կարեւոր դարձավ սպորտային այս մեծ իրադարձությունը: Ռիոյում դժվար է լինելու, բոլորն էլ պայքարելու մինչեւ վերջ, բայց ես էլ բացառություն չեմ լինի:
- Հետեւո՞ւմ ես մրցակիցներիդ ելույթներին:
- Ես չեմ կարողանում նայել մրցակիցներիս հանդիպումները: Տղաներից շատերն են ուսումնասիրում հակառակորդին, իսկ ես չեմ կարողանում: Սիրում եմ ուղղակի հագիստ լինել, մարզչիս խորհուրդները լսել, իսկ հետո արդեն ռինգը ցույց կտա ինչպես գործել:
- Ի՞նչ գիտես Բրազիլիայի մասին:
- Կարծում եմ, այն ավելի հայտնի է որպես ֆուտբոլային երկիր: Շատ ճանաչված ու տաղանդավոր ֆուտբոլիստներ է տվել աշխարհին:
- Վերջերս ի՞նչ վարակ էր Բրազիլիայում մոլեգնել:
- Զիկա վիրուսը: Նույնիսկ խոսվում էր, թե Օլիմպիադան կտեղափոխեն այլ երկիր:
Արթուր ՀովհաննիսյանըԼուսանկարը` Մեդիամաքս
- Բրազիլական սերիալ նայո՞ւմ ես:
- Մեկ-մեկ մարզումից հոգնած գալիս եմ տուն ու պառկում հանգստանալու: Եթե այդ ժամին տատիկս նայելիս է լինում, ես էլ աչքի ծայրով հետեւում եմ:
- Բրազիլացիներին որտե՞ղ խորհուրդ կտաս անպայման այցելել Հայաստանում:
- Տաթեւ, շատ հրաշալի վայր է: Չնայած, մեր երկիրը հարուստ է տեսարժան վայրերով: Կարող են նաեւ Գյումրի գալ:
- Գյումրիում որտե՞ղ կտանես նրանց:
- Նախ կգնանք հաց ուտելու (ծիծաղում է): Հետո տարբեր մշակութային վայրեր կայցելենք:
- Հայաստանն ինչո՞վ է հայտնի աշխարհում:
- Մենք հարուստ մշակույթ ունեցող երկիր ենք: Կարծում եմ, մենք հայտնի ենք նաեւ մեր սպորտով: Անկախությունից հետո մեր մարզիկները շատ մեծ գործ են արել ու ճանաչելի են դարձրել Հայաստանը:
- Խնդրում եմ ավարտիր այս նախադասությունները: Ամենամեծ երջնակությունը…
- գրանցած հաջողությունն է:
- Եթե չլինեի բռնցքամարտիկ, ապա…
- կլինեի ոսկերիչ կամ խոհարար:
- Սպորտում հնարավոր չէ մարզվել առանց…
- հասկացող ու ճիշտ խորհուրդ տվող մարզչի:
Արթուր Հովհաննիսյանի հետ զրուցել է Գոհար Նալբանդյանը
Լուսանկարները՝ Էմին Արիստակեսյանի
Նախագծի գործընկեր
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: