Երեկ երեկոյան հայտնի դարձավ, որ հայ գեղասահորդները չեն մասնակցելու Շեֆիլդում մեկնարկած Եվրոպայի առաջնությանը:
Մեծ Բրիտանիայի դեսպանատունը Սիմոն Դանիլյանցին, Կարինա Ակոպովային ու Նիկիտա Ռախմանինին մուտքի վիզա չի տրամադրել:
Mediamax Sport-ն առաջացած իրավիճակի մասին պարզաբանումներ ստանալու համար դիմել է Հայաստանի գեղասահքի ֆեդերացիա, որտեղից այսպես են արձագանքել.
«Այնպես չէ, որ Մեծ Բրիտանիայի դեսպանատունը մերժել է, ուղղակի վիզաներն ուշացնում են: Բազմաթիվ նամակներ ենք գրել, բայց պատասխան դեռ չունենք: Հնարավոր է՝ վիզաները մի քանի օրից ստանանք, բայց մրցումներն արդեն ավարտված կլինեն:
Այն, որ գեղասահորդների անձնագրերը պատրաստ են, մեզ տեղեկացրել են ԵԱ-ի լոնդոնյան կազմկոմիտեից: Լուրը ստանալուց հետո մեր մարզիկները գնացել են Վիզաների աջակցման կենտրոն, որտեղ նրանց ծաղրել են ու ծիծաղելով ասել. «Ինչե՞ր եք խոսում: Մենք վիզաների հաստատման մասին տեղեկություն չունենք»:
Նույնիսկ չեն թողել դռնից ներս մտնել, Կարիանա Ակոպովան լացակումած խնդրել է. «Վաղը մրցումները մեկնարկում են, խնդրում ենք վիզաները տրամադրել, քանի որ Լոնդոնից հաստատումը ստացել ենք»: Պատասխանել են, որ նրանց գործը դեռ քննարկման փուլում է:
Նորից ենք նամակ գրել միջազգային ֆեդերացիա (ISU) ու կրկին վստահեցրել են, որ փաստաթղթերը պատրաստ են: Նույն օրը մարզիկները եւս մեկ անգամ են գնացել վիզաների կենտրոն, բայց անգամ դուռը չեն բացել ու արհամարհական վերաբերմունք են ցույց տվել:
Եվրոպայի առաջնությունը պարզապես սովորական մրցաշար չէ, որը կարող ենք բաց թողնել: Մեզ զրկեցին լավագույն եռյակում կամ հնգյակում ընդգրկվելուց, որովհետեւ մեր զույգը բավական ուժեղ է:
Լուսանկարը` Անձնական արխիվ
Օլիմպիական խաղերից առաջ մեր գեղասահորդները պետք է մրցաշարի մասնակցեին, դրա համար եղանք նաեւ Հայաստանի Օլիմպիական կոմիտեում, որտեղ նույնպես չկարողացան օգնել: Հեռախոսազանգով նաեւ ԿԳՄՍ-ին դիմեցինք, նշեցին, որ ծավալուն ու ժամանակատար թղթաբանական աշխատանքի կարիք կլինի եւ ֆեդերացիան ինքը կարող է զբաղվել այդ ամենով, ինչն էլ արել ենք:
Ամեն ինչ ճիշտ ընթացակարգով ենք իրականացրել ու Մեծ Բրիտանիայի դեսպանատուն դիմել դեկտեմբերի 10-ին: Սովորաբար սպորտային մրցումների մասնակցելու դեպքում պատասխանը լինում 10-օրյա ժամկետում:
Դեսպանատանը մեծ վճարներ ենք կատարել: Երբ վիզան չստանալուց հետո Կարինան ցանկացավ անձնագրերը հետ ստանալ ու մարզումները շարունակելու համար վերադառնալ Սոչի, նորից գումար պահանջեցին: Յուրաքանչյուրի անձնագիրը վերադարձնելու համար մեզնից 38-հազարական դրամ վերցրին:
Լուսանկարը` Մեդիամաքս
Լոնդոնի կազմկոմիտեի անդամներին չենք ճանաչում, բայց վիզաների կենտրոնում հայեր են աշխատում ու նրանք մեր մարզիկների նկատմամբ շատ անհարգալից վերաբերմունք ցուցաբերեցին: Ինչպե՞ս էր կարելի նրանց նման սթրեսի ենթարկել:
Դեսպանատունը մեզ նաեւ վիզաների մերժման փաստաթուղթը չի տրամադրել, որպեսզի ավիատոմսերի վերադարձի գումարը հետ ստանանք: 2 անգամ տոմս ենք գնել՝ մինչեւ վերջ հավատալով, որ առաջնությանը կմասնակցենք:
Նույն բարդ իրավիճակն է նաեւ Գերմանիայի դեսպանատան պարագայում։ Պատանի գեղասահորդներն այնտեղ միջազգային մրցումների պետք է մասնակցեն: Միքայել Սալազարյանը մարտին Եվրոպայի առաջնությունում է հանդես գալու, եվրոպական այլ մեկնարկներ եւս ունի։
Մեկ ամիս առաջ ենք դիմել, ֆեդերացիային կոպիտ պատասխանել են. «Էլ մի՛ գրեք, սպասե՛ք»: Մեծ Բրիտանիայի դեսպանատան հետ դեպքը հաշվի առնելով՝ այսօր նամակ ենք գրել ԿԳՄՍ-ի միջազգային բաժին, որ իրենք էլ դիմեն Գերմանիայի դեսպանատուն ու մեզ օր հատկացնեն»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: