Արթուր Ավետիսյանը եւ Վահագն Դավթյանը Աշխարհի Գավաթի եզրափակչում են

Երեկ հայ մարմնամարզիկները մեկնարկել են Կահիրեում ընթացող վարկանշային մարմնամարզության Աշխարհի գավաթի խաղարկությունում:

Օղակների վարժությունում եզրափակիչ է անցել Հայաստանի միանգամից երկու մասնակից: Արթուր Ավետիսյանը վաստակել է 14.533 միավոր ու առաջին տեղով հաղթահարել որակավորման փուլը, իսկ Վահագն Դավթյանը նույնքան միավորներով երկրորդը եղել:

Հարություն Մերդինյանը նժույգթափերի վրա 14.333 միավորով 9-րդ տեղն է զբաղեցրել ու պահեստային է: Գագիկ Խաչիկյանը 13.700 միավորով 22-րդն է: Հայաստանի ներկայացուցիչներից դեռ պայքարի մեջ չի մտել միայն Արթուր Դավթյանը (հենացատկ):

Կահիրեից բացի, վարկանշային են լինելու նաեւ Կոտբուսի, Բաքվի եւ Դոհայի մրցաշարերը։ Յուրաքանչյուր մրցաշարում ոսկե մեդալակիր դարձած մարզիկը կստանա 30, արծաթը՝ 25, բրոնզը՝ 20, 4-րդ տեղը՝ 18 միավոր։ Եզրափակիչները կայանալու են փետրվարի 17-18-ին: