Ավտոմոբիլային ֆեդերացիան FIA-ին տեղյակ է պահել Ադրբեջանի վայրագությունների մասին

Հայաստանի ավտոմոբիլային ֆեդերացիան Արցախում էթնիկ զտումները եւ ցեղասպանությունը կանխելու շտապ կոչով դիմել է միջազգային ֆեդերացիային:

«Հարգելի գործընկերներ ու ընկերներ, FIA-ն ավտոսպորտի կարեւորագույն մարմինն է, այն կազմակերպում է բազմաբնույթ մրցարշավային միջոցառումներ: Մեր կազմակերպությունը 100 տարուց ավելի մշտապես գործել է նաեւ հանուն կյանքերի փրկության:

Ընդամենը մի քանի օր առաջ ենք ստացել դեկտեմբերի 5-8-ը Բաքվում կայանալիք FIA-ի Գլխավոր ասամբլեային մասնակցելու հրավեր:

Ադրբեջանն այն երկիրն է, որը 2020 թվականի պատերազմից հետո մշտապես բռնություն է գործադրել հայ խաղաղ բնակչության նկատմամբ, քանդել նրանց տներն ու պաշտամունքի վայրերը, հազարավոր ընտանիքների տեղահանել:

Վերջին 9 ամիսների ընթացքում այդ երկրի կառավարությունը լիակատար շրջափակման մեջ է պահել Արցախը՝ զրկելով էլեկտրաէներգիայից, ջրից, սննդից ու մնացած անհրաժեշտ պարագաներից, թույլ չի տվել մարդասիրական օգնություն հասնել՝ դրանով իսկ սովի եւ նվաստացման ենթարկելով տեղի բնակչությանը:

Այսօր նրանք նոր պատերազմ են սկսել խաղաղ բնակչության դեմ, որի նպատակն է հազարամյակներով իրենց հողի վրա ապրող 120 հազ. հայերի էթնիկ զտումների ենթարկել:

Որպես FIA-ի շուրջ համախմբված մեծ ընտանիք՝ հանուն այս կարեւոր խնդրի գործելու ազդեցություն եւ պատասխանատվություն ունենք:

Բարձրացրեք իրազեկությունը, օգտագործեք մեր մեծ հարթակը եւ ուշադրություն հրավիրեք Արցախի ճգնաժամի վրա, միաժամանակ դատապարտեք բռնությունն ու  էթնիկ զտումները:

Հանդես եկեք հանուն խաղաղության, կոչ արեք Ադրբեջանի կառավարությանը անհապաղ դադարեցնել հակամարտությունը եւ աշխատել միայն խնդրի խաղաղ կարգավորման ուղղությամբ: Մեր հավաքական պարտքն է կանխել ցեղասպանության կրկնությունը, կարեւոր փոփոխություն անելու ներուժ ունենք:

Կոչ ենք անում FIA-ին ցուցաբերել սկզբունքային դիրքորոշում եւ գործել արագ՝ անմեղ կյանքեր փրկելու եւ համամարդկային արժեքները պաշտպանելու համար»։