«Ակրոն»-ում հավատում են, որ Էդգար Սեւիկյանը կուժեղացնի իրենց կազմը

Հայաստանի ազգային հավաքականի կիսապաշտպան Էդգար Սեւիկյանը տեղափոխվել է ռուսական «Ակրոն»։

Սեւիկյանին Տոլյատիի թիմը հունգարական «Ֆերենցվարոշ»-ից վարձակալության սկզբունքով ձեռք է բերել մինչեւ 2025-26 մրցաշրջանի ավարտը՝ գնելու իրավունքով։

«Էդգարը տեխնիկապես հարուստ ու տաղանդավոր ֆուտբոլիստն է, լավ է գնահատում իրավիճակներն ու որոշումներ կայացնում։ Հույս ունեմ, նա մեզ կօգնի»,- «Ակրոն»-ի պաշտոնական կայքին հայտնել է գլխավոր մարզիչ Զաուր Տադեեւը։

«Ակրոն»-ը Ռուսաստանի առաջնությունում ընթանում է 13-րդ տեղում, սեպտեմբերի 13-ին հանդիպելու է առաջատար «Կրասնոդար»-ին։

Սեւիկյանը «Ֆերենցվարոշ» էր տեղափոխվել 2024-ի հունվարին, որի կազմում անցկացրել է 19 հանդիպում՝ դառնալով երկու գոլի հեղինակ։ Օրեր առաջ նա Հայաստանի հավաքականի ճամբարում էր, որի հետ մեկնարկեց Աշխարհի առաջնության ընտրական փուլում։