Առեղծվածային կերպով սպառված Հայաստան-Պորտուգալիա խաղի տոմսերը. Երկրպագուները դժգոհ են

Հայաստանի ֆուտբոլի ֆեդերացիան հայտնել է, որ սեպտեմբերի 6-ին 2026 թ. Աշխարհի առաջնության որակավորման փուլում Պորտուգալիայի հետ հանդիպման բոլոր տոմսերն արդեն վաճառվել են:

Տոմսերի վաճառքը tickets.ffa.am կայքում մեկնարկել է երեկ առավոտյան մոտ ժամը 10-ին, սակայն մոտ մեկ ժամ անց տեխնիկական խնդիրների պատճառով վաճառքը դադարեցվել է:

«Tickets.ffa.am կայքում այցելուների մեծածավալ հոսքի պատճառով առաջացել են տեխնիկական խնդիրներ, որոնք կարգավորվում են: Այսօր ժամը 14:00-ից Հայաստան-Պորտուգալիա հանդիպման տոմսերը ձեռք բերելու համար կթողարկվի հերթային համակարգ, որն ավելի պարզ ու անխափան կդարձնի գնման գործընթացը»,- հայտնեց ՀՖՖ-ն:

Իսկ մոտ 14:00-ի սահմաններում ֆեդերացիան տեղեկացրեց, որ այդ պահի դրությամբ վաճառվել է 2500 տոմս: Սակայն ողջ օրվա ընթացքում կայքն այդպես էլ չվերականգնվեց, իսկ երեկոյան հայտնի դարձավ, որ այլեւս հասանելի տոմսեր չկան, թե ինչպես ու ինչ սկզբունքով դրանք վաճառվեցին, այդպես էլ շատերի համար մնաց առեղծված:

Երեկվանից սոցկայքերում երկրպագուները իրենց բողոքն են արտահայտվում տոմսերի վաճառքն այդքան վատ կազմակերպելու պատճառով: Նրանից շատերն այդպես էլ չեն կարողացել տոմսեր ձեռք բերել: 

Մոտ 14 հազար նստատեղ ունեցող Վազգեն Սարգսյանի անվան հանրապետական ստադիոնի արեւմտյան տրիբունայի տոմսերի արժեքը 14-20 հազ. դրամ էր, արեւելյանը՝ 8-10 հազ. եւ 14 հազ. դրամ, հյուսիսայինն ու հարավայինը՝ 1000-2000 եւ 3000-4000 դրամ: