Մելիքբեկյանը՝ Ջանջոյանին. «Թույլ չենք տա հակապետական գործելաոճով խոչընդոտել մեզ»

Հայաստանի ֆուտբոլի ֆեդերացիայի նախագահ Արմեն Մելիքբեկյանը պատասխանել է «Հայկական առաջին ճակատ» շարժման ղեկավար Սերգեյ Ջանջոյանի ֆեյսբուքյան գրառմանը:

«Երեկ Ջանջոյանն անդրադարձել է իմ՝ ՈւԵՖԱ-ի գործկոմի անդամ դառնալուն խանգարելու իրենց մտադրությունների մասին:

Համարում եմ, որ Ջանջոյանի հայտարարությունը ոչ այլ ինչ է, քան խայտառակություն։ Քանզի մի բան է, երբ երկրպագուների մի խումբ պահանջում է ՀՖՖ նախագահի հրաժարականը, մեկ այլ բան է, երբ հայտ է ներկայացվում խոչընդոտել եվրոպական կառույցի ղեկավար մարմնում ներկայացուցիչ ունենալու եւ Հայաստանը միջազգային հարթակներում պատվով ներկայացնելու փորձին:

Սա առնվազն հակահայաստանյան քայլ է, որը վնաս է հասցնելու պետության հեղինակությանը եւ ակնհայտորեն ուղղված է հայկական ֆուտբոլի դեմ: Փաստորեն, նման մտադրություններ ունեցողները փորձում են խոչընդոտել Հայաստանի՝ որպես ինքնիշխան պետություն միջազգային ասպարեզում ներկայանալու հնարավորությանը։  

Դրանից բացի, Ջանջոյանը, խեղաթյուրելով իրականությունը, նաեւ հնչեցնում է անձնական բնույթի վիրավորանքներ եւ կեղծ ու անհիմն մեղադրանքներ, որոնց պատասխան կտրվի օրենքով սահմանված կարգով:

Թույլ չենք տալու հակապետական գործելաոճով աչքի ընկնող մարդկանց խոչընդոտել մի գործընթացի, որից միայն շահելու է հայկական ֆուտբոլը եւ անելու ենք ամեն հնարավորը ֆուտբոլը նման մարդկանցից ազատելու համար:

ՈւԵՖԱ-ի գործկոմի կազմում իմ առաջադրումն ինքնանպատակ չէ, այլ վերջին տարիներին ՈւԵՖԱ-ում իմ ու ՀՖՖ ներկայացուցիչների գործունեության տրամաբանական շարունակությունն է։ Նախընտրական արշավի ընթացքում ես ՈւԵՖԱ-ի անդամ ֆեդերացիաներին ներկայացրել եմ եվրոպական ֆուտբոլի զարգացման իմ տեսլականը, այն է՝ պահպանել ու զարգացնել եվրոպական սպորտի մոդելը ֆուտբոլում եւ դա կարեւոր եմ համարում հատկապես միջին ու փոքր երկրների, այդ թվում՝ Հայաստանի համար»։

Լուսանկարը` ՖԱՖ