Հենրիխ Մխիթարյանը` տարվա լավագույն ֆուտբոլիստ, Վարդան Մինասյանը` լավագույն մարզիչ

Երեւան: Մեդիամաքս: Հայաստանի ազգային հավաքականի կիսապաշտպան Հենրիխ Մխիթարյանը ճանաչվել է այս տարվա լավագույն ֆուտբոլիստ:

Ինչպես հաղորդում է Մեդիամաքս-ը, երեկ Երեւանում կայացել է Հայաստանի ֆուտբոլի ազգային հավաքականի մեծարման երեկոն, որը կազմակերպել է Հայաստանի  ֆուտբոլի ֆեդերացիան:

Հավաքականի մեծարման երեկոյին մասնակցել են ՀՀ նախագահ Սերժ Սարգսյանը, վարչապետ Տիգրան Սարգսյանը եւ բարձրաստիճան այլ այրեր:

Տարվա լավագույն ֆուտբոլիստին որոշելու համար բարձրագույն խմբի ակումբներից ներկայացվել է 35 թեկնածություն, ազգային հավաքականից` 11, իսկ երիտասարդական հավաքականից` 5 ֆուտբոլիստի թեկնածություն:

Հենրիխ Մխիթարյանին «Ոսկե խաղակոշիկը» եւ դրամական պարգեւը հանձնել է ՀՖՖ նախագահ Ռուբեն Հայրապետյանը:

Տարվա լավագույն ֆուտբոլիստ անվանակարգում 2-րդ տեղը զբաղեցրել է եւ «Արծաթե խաղակոշիկ» է ստացել հավաքականի հարձակվող Յուրա Մովսիսյանը:

Անվանակարգում 3-րդ տեղն է գրավել հավաքականի դարպասապահ Ռոման Բերեզովսկին` ստանալով «Բրոնզե խաղակոշիկ»:  

“Տարվա լավագույն մարզիչ” անվանակարգում առաջին տեղն է զբաղեցրել ազգային հավաքականի գլխավոր մարզիչ Վարդան Մինասյանը:

Բացի այդ, հայկական ֆուտբոլի զարգացման գործում ներդրած նշանակալի ավանդի, երկար տարիների նվիրումի եւ ձեռք բերած մարզական հաջողությունների համար ՀՀ նախագահը Ռոման Բերեզովսկուն պարգեւատրել է «Հայրենիքին մատուցած ծառայությունների համար» 2-րդ աստիճանի մեդալով, իսկ ֆիզիկական կուլտուրայի եւ սպորտի զարգացման գործում ներդրած նշանակալի ավանդի, ֆուտբոլի ասպարեզում ունեցած մեծ հաջողությունների, ձեռք բերած մարզական փայլուն նվաճումների համար հավաքականի ավագ Սարգիս Հովսեփյանին՝ Մովսես Խորենացու մեդալով:

Նախագահը վստահություն է հայտնել, որ Հայաստանի ֆուտբոլի հավաքականի բոլոր անդամները ժամանակին պարգեւատրվելու են ամենաբարձր պետական պարգեւներով:

«Ուզում եմ, որպեսզի ձեզնից յուրաքանչյուրը վստահ լինի, որ իր թիկունքում պետություն է կանգնած, պետություն, որ պատրաստ է այլեւս սատարելու, օժանդակելու իր մարզիկներին»,- ընդգծել է Սերժ Սարգսյանը: