Օլիմպիադայի նախավերջին տուրում Հայաստանի ընտրանիները ոչ-ոքի են խաղացել

Բուդապեշտում ավարտին մոտեցող Համաշխարհային շախմատի Օլիմպիադայում կայացել են նախավերջին տուրի հանդիպումները։

Հայաստանի տղամարդկանց ու կանանց հավաքականներն ոչ-ոքի են խաղացել մրցակիցների հետ։

Տղամարդկանց ընտրանին 2:2 հաշիվն է գրանցել Գերմանիայի հետ։ Հաղթանակ է տարել միայն Ռոբերտ Հովհաննիսյանը, նա ուժեղ է եղել Ալեքսանդր Օնիշուկից։ Հայկ Մարտիրոսյանն ու Շանթ Սարգսյանը կիսել են միավորները, իսկ Գաբրիել Սարգսյանը՝ զիջել։ Հայաստանի հավաքականը 15 միավորով 9-րդն է, առաջատարը 19 միավորով Հնդկաստանն է։

Կանայք էլ նույն հաշվով են ավարտել Իսպանիայի դեմ դիմակայությունը։ Էլինա Դանիելյանն ու Աննա Սարգսյանը հաղթանակներ են տարել, իսկ Լիլիթ Մկրտչյանն ու Մարիամ Մկրտչյանը՝ զիջել։

Կանայք 15 միավոր ունեն եւ 6-րդն են։ Այսօր կայանալիք վերջին տուրում նրանք մրցելու են Գերմանիայի դեմ, իսկ տղամարդիկ՝ Իրանի: