Վիկ Դարչինյանը մայիսին պլանավորում է ավարտել կարիերան

4 քաշային կարգերում Աշխարհի նախկին չեմպիոն Վիկ Դարչինյանը պլանավորում է ավարտել կարիերան:

41-ամյա հայ բռնցքամարտիկը Փերթում (Ավստրալիա) մարտի 10-ին մենամարտելու է Թայլանդը ներկայացնող Մանոտ Կոմպուտի հետ:

Դա 2016-ի ամռանը նոկաուտով պարտությունից հետո Դարչինյանի առաջին մենամարտն է լինելու:

«Այդ մենամարտում ես շատ սխալներ եմ թույլ տվել: Հիմա պատրաստվում եմ վերադարձնել մարդասպանի իմ ունակությունները: Ռինգից դուրս բարի եմ, սակայն ռինգում իսկական մարդասպան եմ»,-thewest.com.au-ին ասել է Դարչինյանը:

Դրանից հետո նա մայիսին պլանավորում է մեկնել Ռուսաստան ու մենամարտել Աշխարհի նախկին չեմպիոն Եվգենի Գրադովիչի հետ: Դարչինյանի խոսքով, մրցակիցն ընդամենը 2 պարտություն ունի ու բավականին ուժեղ բռնցքամարտիկ է: Նա Դարչինյանից փոքր է 11 տարով:

«Ես ցանկանում եմ եւս մեկ մեծ մենամարտ անցկացնել ու ավարտել կարիերաս: Մարզվելու քաղց եմ զգում»,-ասել է նա: