ՊՍԺ-ն պատմության մեջ առաջին ֆրանսիական թիմն է, որը կարողացել է թրեբլի հասնել եւ Չեմպիոնների Լիգայի եզրափակչում հաղթել 5 գոլի տարբերությամբ։
Դեզիրե Դուեն Չեմպիոնների Լիգայի եզրափակչում դուբլի հեղինակ դարձած ամենաերիտասարդ խաղացողն է։ Նա նաեւ ՉԼ-ի եզրափակչի առաջին խաղացողն է, որը մասնակցել է թիմի 3-ից ավելի գոլերին։
Լուիս Էնրիկեն պատմության 2-րդ մարզիչն է, որը երկու տարբեր ակումբների հետ միեւնույն մրցաշրջանում թրեբլի հեղինակ է դարձել: 2015-2025 մրցաշրջանում դա նրան հաջողվել է «Բարսելոնա»-ի հետ, իսկ այս տարի՝ ՊՍԺ-ի: Ֆրանսիական ակումբը Ֆրանսիայի չեմպիոն, գավաթակիր ու ՉԼ-ի հաղթող է հռչակվել:
Նրանից առաջ դա կատալոնական ակումբի եւ «Մանչեսթեր Սիթի»-ի հետ հաջողվել էր Պեպ Գվարդիոլային 2008-2009 եւ 2022-2023 թվականներին:
ՊՍԺ-ի աննախադեպ տարին
Ստացված մրցաշրջանը ՊՍԺ-ն ավարտեց ՉԼ-ի եզրափակչում «Ինտեր»-ի նկատմամբ 5:0 հաշվով տարած հաղթանակով: Բազմաթիվ տարիներ անց՝ միլիոնավոր դոլարներ ծախսելուց, աշխարհի ամենահայտնի ֆուտբոլիստներին ու մարզիչներին փորձարկելուց հետո միայն ՊՍԺ-ն կարողացավ տիրանալ այդքան սպասված գավաթին: Դրանում անչափ մեծ էր Լուիս Էնրիկեի ներդրումը:
Լուսանկարը` UEFA
Դրա համար էլ ՉԼ-ի գավաթը գլխավերեւում բարձրացնելուց անմիջապես հետո ՊՍԺ-ի ֆուտբոլիստներն անմիջապես մտածեցին մարզչի մասին ու գտան նրան, բարձրացրին ձեռքերի վրա ու սկսեցին օդ նետել:
«Ալյանց արենա»-ում Էնրիկեի մասին չէին մոռացել ու իրենց հարգանքի տուրքն են մատուցել նաեւ ՊՍԺ-ի երկրպագուները: Նրանք Լուիս Էնրիկեի ու նրա դստեր՝ 9 տարեկանում քաղցկեղից մահացած Խանայի պատկերով մեծ պաստառ էին պատրաստել, որում նա հայրիկի հետ խաղադաշտում տեղադրում է ՊՍԺ-ի դրոշը:
55-ամյա մարզչին այդ տեսարանն անչափ հուզել էր, նա ձեռքը դրեց սրտին ու իր շնորհակալությունը հայտնեց տրիբունաներին: Էնրիկեի հագին էլ նմանատիպ պատկերով լուսանկար էր ու վրան գրված՝ «Մենք չեմպիոն ենք»:
Կյանքի դժվարին փուլը
2019-ին Էնրիկեի դստեր մոտ ոսկորների հազվադեպ քաղցկեղ ախտորոշեց, այդ ժամանակ նա Իսպանիայի ընտրանու հետ Մալթայում էր, որտեղ ԵՎՐՈ-2020-ի որակավորման հանդիպում էին անցկացնելու: Մարտի 25-ի երեկոյան կինը զանգահարեց Էնրիկեին ու պատմեց դստեր առողջական վիճակի մասին, եւ Իսպանիայի ֆուտբոլի թագավորական ֆեդերացիան անմիջապես Էնրիկեին հատուկ չվերթով ուղարկեց Բարսելոնա:
Լուսանկարը` Getty Images
Նա Իսպանիայի հավաքականի 3 հանդիպում բաց թողեց, ապա որոշեց թողնել պաշտոնը, քանի որ չէր կարողանում կենտրոնանալ աշխատանքի վրա: Այդ ժամանակ Իսպանիայում ոչ ոք չգիտեր Խանայի հիվանդության մասին: Իսպանական ԶԼՄ-ն այդ հարցում զարմանալի միասնականություն էին ցուցաբերում եւ այդ մասին ոչինչ չէին գրում: Նրանք էթիկապես ճիշտ չէին համարում ընտանիքից շուտ հայտնել լուրը:
Էնրիկեն մինչեւ վերջ մնաց դստեր մոտ, նա ամեն օր հիվանդանոցում էր լինում ու, Marca-ի տեղեկություններով, ապրումների արդյունքում չափազանց շատ նիհարեց:
Խանան մահացավ 2019-ի օգոստոսի 29-ին, մահվան մասին Էնրիկեն ինքը հայտնեց. «Մեր դուստր Խանան 5 ամիս հիվանդության դեմ պայքարելուց հետո մահացավ: Շնորհակալ ենք բոլորին դրսեւորած սիրո ու ամեն ինչ հասկանալու համար: Շնորհակալ ենք նաեւ Սան Ժոան դե Դեւ եւ Սան Պաու հիվանդանոցներին իրենց նվիրված աշխատանքի եւ հոգատարության համար: Շնորհակալություն բժիշկներին, բուժքույրերին ու բոլոր կամավորներին:
Խանա՛, կկարոտենք քեզ: Մեր կյանքի ամեն օրը հիշելու ենք քեզ հետ անցկացրած յուրաքանչյուր պահն ու հուսալու ենք, որ նորից կհանդիպենք: Հանգչիր խաղաղությամբ, Խանիտա: Քո ընտանիք»:
Լուսանկարը` PSG
Ողջ ֆուտբոլային աշխարհը աջակցեց Էնրիկեի ընտանիքին: Լուիս Սուարեսը «Վալենսիա»-ի դարպասը խփած գոլից հետո X ցույց տվեց՝ ի հիշատակ Խանայի: Նրա դուստր Դելֆինան Խանայի հետ նույն դպրոցն էր գնում:
Երկար ժամանակ անց դստեր մասին խոսելիս Էնրիկեն նշել է, որ Խանան իրենց 9 հիանալի տարի է նվիրել՝ լի հազարավոր հիշողություններով եւ ուրախությամբ: Նրա մահից 6 տարի անց էլ մարզիչը խոստովանել է, որ շարունակում է զգալ դստեր դրական էներգիան: «Նա միշտ կողքիս է, իմ ու ընտանիքիս պահապան հրեշտակն է»:
Լուիս Էնրիկեն ու կինը՝ Ելենան, միասին են 1996 թվականից ու եւս 2 երեխա ունեն: Ավագ որդին՝ Պապոն 27 տարեկան է, իսկ դուստր Սիան՝ 25:
Նոր ՊՍԺ-ն
Բոլորը կարծում էին, որ Կիլիան Մբապեի հեռանալուց հետո ՊՍԺ-ում անկում կնկատվի, սակայն մարզչի համար դա կատարելագործվելու, ավելի լավն ու միասնական դառնալու հնարավորություն էր:
«Ուզում էի պահել Կայկիին (Մբապե), բայց պարտավոր էի ընդունել նրա կայացրած որոշումը: Դրանից հետո ցանկանում էի բոլորին ապացուցել, որ ՊՍԺ-ում կան աստղեր, որոնք պատրաստ են ծառայել ակումբին»,- Մյունխենում ասուլիսի ժամանակ ասաց Էնրիկեն:
Լուսանկարը` UEFA
Այդ տրամադրվածության ու Էնրիկեի ջանքերի շնորհիվ ՊՍԺ-ն այս տարի 3 տիտղոսի տիրացավ. «Չէի սպասում, որ եզրափակչում այսպես կհաղթենք: Թիմը երկար ժամանակ ճնշման տակ էր գտնվում, բայց պատմության մեջ մտնելը ոչ մի բանի հետ համեմատելի չէ»,- հաղթանակից հետո նշեց մարզիչը:
Այդքան սպասված Գավաթը նվաճելուց հետո նա նայել է երկնքին ու հիշել դստերը. «Խանան միշտ է ինձ հետ՝ հաղթանակների ու պարտությունների ժամանակ: Բայց հիմա տխրելու եւ հույզերին տրվելու ժամանակը չէ: Պետք է պարզապես վայելել այս հիանալի րոպեները»:
Մարզչական ուղին
Լուիս Էնրիկեի կայացման ուղին այնքան էլ հեշտ չի եղել, նրան միանգամից չեն հրավիրել «Բարսելոնա»-ի գլխավոր թիմը մարզելու: Նախ փորձ է հավաքել «Ռոմա»-ում եւ «Սելտա»-ում եւ սեփական ձախողումների վրա կայացել: Էնրիկեն սովորեց հարմարվել ֆուտբոլիստներին ու նրանց համակարգին հարմարվելու համար չկոտրել:
Եվ այդ մոտեցումն իր արդյունքը տվեց՝ 2015 թ. սկսած նա 16 տիտղոսի է տիրացել՝ 9-ը «Բարսելոնա»-ի, եւ 7-ը՝ ՊՍԺ-ի հետ: Էնրիկեն 2015-ին լավագույն մարզիչ է ճանաչվել ու Իսպանիայի ընտրանու հետ հասել ԵՎՐՈ-2020-ի կիսաեզրափակիչ:
10 տարվա ընթացքում նա 3 ուժեղ թիմ կառուցեց, Էնրիկեի «Բարսելոնա»-ն առաջին հերթին ասոցացվում է հարձակվողական հզոր եռյակի՝ Մեսսի-Նեյմար-Սուարեսի հետ: Նրա Իսպանիան ամբողջությամբ վերահսկում էր գնդակն ու խաղը, իսկ ՊՍԺ-ն հակագրողների ու գրոհների վարպետ է: Էնրիկեն իր հարձակման գծի խաղացողներին թույլ է տալիս անընդհատ փոխել դիրքերն ու ստեղծագործելու համար ավելի շատ տարածություն ստանալ:
Լուսանկարը` PSG
Դեռ երբեք ՊՍԺ-ն այսքան միասնական, ուժեղ ու տարբերվող չի եղել եւ դրանում, իհարկե, մեծ դեր ունի Էնրիկեն:
Որպես ֆուտբոլիստ էլ նա մեծ կարիերա է ունեցել, հանդես է եկել նախ «Ռեալ»-ում, ապա համարձակվել տեղափոխվել «Բարսելոնա»։ Երկու ակումբների հետ էլ տիրացել է բազմաթիվ տիտղոսների:
Իսպանիայի հավաքականի հետ աշխարհի 3 առաջնությունների (1994, 1998, 2002) եւ ԵՎՐՈ-1996-ին է մասնակցել, 1992-ին տնային Օլիմպիական խաղերում չեմպիոն հռչակվել: Իր կարիերայում նա 400 հանդիպում է անցկացրել ու 102 գոլ խփել:
Ֆուտբոլից բացի Էնրիկեն հետաքրքրվում է սերֆինգով, հեծանվասպորտով ու մասնակցում է մարաթոնների: Ուժերն է փորձել Սահարայում կայացած ուլտրամարաթոնին, որը տեւել է 6 օր: Մանուկ տարիքից մեքսիկացի խաղացող Լուչո Ֆլորեսի պատվին ստացել է Լուչո մականունը:
Հասմիկ Բաբայան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: