2025 թվականի Չեմպիոնների լիգայի քառորդ եզրափակիչը խոստանում է լինել ավելի հետաքրքիր ու դինամիկ, քան մրցաշարի նախորդ փուլերը։ Այս նյութում կներկայացնենք հիմնական վերլուծություններն յուրաքանչյուր հանդիպման վերաբերյալ՝ փորձելով հասկանալ, թե ով ունի առավել մեծ շանսեր՝ կիսաեզրափակչի ուղերգրեր վաստակելու համար։
«Բավարիա» - «Ինտեր»
Լուսանկարը` Reuters
Մյունխենի «Բավարիան» միշտ եղել է ՉԼ գլխավոր ֆավորիտներից մեկը։ Կոմպանիի թիմը 1/16 փուլում մի կերպ անցնելով շոտլանդական «Սելթիկ»-ին՝ ստիպեց կասկածել, որ հաջորդ փուլում կկարողանա անցնել Լեւերկուզենի «Բայեր»-ին, սակայն Քեյնը եւ ընկերները նույնիսկ մեկ գոլ բաց չթողեցին երկու խաղերում եւ հաղթեցին ընդհանուր 5-0 հաշվով։ «Բավարիան» կառուցում է խաղը՝ տիրապետելով միջին գոտիին, ու օգտագործում է գերխոշոր հարձակում․ Քեյնը, Մուսիալան եւ Օլիսը դարձել են շատ խաղակցված եռյակ։ Կիմիխը եւ Գորեցկան, կարելի է ասել, անթերի խաղ անցկացրին «Բայերի» դեմ։ Նրանք պատասխանատու են թիմի ռիթմի կառավարման համար։ Ներկա պահին «Բավարիան» շատ կայուն թիմ է։
Սիմոնե Ինձագին «Ինտերը» վերածել է փայլուն դիրքային խաղ ցույց տվող թիմի։ Իտալացիներն ունեն շատ հզոր եւ կայուն կիսապաշտպանություն, գրոհների եզրափակողներ Լաուտարո Մարտինեսը եւ Մարկուս Տյուրամը լավ մարզավիճակում են։ Կիսապաշտպաններ Հենրիկ Մխիթարյանը, Հաքան Չալհանօղլուն եւ Նիկոլո Բարելան անդադար փոխվում են դիրքերով ու շփոթեցնում մրցակցին՝ ստանալով ավելի շատ հնարավորություններ գրոհները զարգացնելու համար։
Լուսանկարը` Reuters
«Ինտերը» պետք է ցուցադրի ուժեղ պաշտպանություն եւ հենվի արագ հակահարձակման վրա, որպեսզի կարողանա դիմադրել «Բավարիայի» հարձակմանը։ Սակայն այս խաղում մեծ հավանականություն կա, որ «Բավարիան» ավելի ուժեղ կլինի եւ կկարողանա հաղթել: Նույնիսկ եթե Ինտերը փակվի պաշտպանությունում, Կոմպանիի թիմը կարող է կազմակերպել շատ ինտենսիվ հարձակում։
ՊՍԺ - «Ասթոն Վիլա»
Էնրիկեի թիմը «Լիվերպուլի» հետ խաղում ցուցադրեց, որ կարող է անդադար գրոհել եւ չհանձնվել, երբ ինչ-որ բան չի ստացվում։ Համառության շնորհիվ մերսիսայդյան թիմը դիմակայությունը հասցրեց 11-մետրանոցների, սակայն այդտեղ իր կարգը ցույց տվեց Դոնարուման։ «Ասթոն Վիլան» համեմատաբար ավելի հեշտ մրցակից է, քան «Լիվերպուլը», բայց դա չի նշանակում, որ «առյուծները» կռիվ չեն տալու մինչեւ վերջին շունչը։
Լուսանկարը` Reuters
«Ասթոն Վիլան» անկասկած մեծ անակնկալ թիմ է։ Թիմը բարելավել է իր խաղը վերջին հանդիպումներում՝ շատ կարեւոր հաղթանակներ գրանցելով։ Նրանք խաղում են ամուր ու ուժեղ, փորձելով պաշտպանական մարտավարություն կիրառել՝ զուգահեռ ավելացնելով հարձակումները։ Սակայն ՊՍԺ-ի դեմ խաղը կարող է մի փոքր ուրիշ լինել։ Շատ ենք նշել, որ Էմերին մեծ փորձ ունի եվրագավաթներում, բայց հիմա մրցակից թիմի մարզիչը Լուիս Էնրիկեն է, ով ունի ոչ պակաս փորձ։
«ՊՍԺ»-ն չունի ակնառու թույլ կողմեր եւ պետք է առանց մեծ խնդիրների հաղթի «Ասթոն Վիլային»՝ չնայած վերջինիս լավ ելույթներին։ «Փարիզը» բավականին ուժեղ է, եւ մենք կանխատեսում ենք, որ նրանք կհաղթեն այս դիմակայությունում։ Էմերին կփորձի անհարմարություններ ստեղծել Էնրիկեի համար, սակայն ընդհանուր դիմակայությունում կպարտվի։
«Արսենալ» – «Ռեալ» Մադրիդ
Լուսանկարը` Reuters
Միկել Արտետայի գլխավորությամբ «Արսենալը» ավելի արդյունավետ է դարձել՝ լավ հանդես գալով Անգլիայի Պրեմիեր լիգայում ու էլ ավելի լավ զարգացնելով իրենց խաղային համակարգը։ Առաջին հերթին, թիմը կարողանում է խաղալ մեծ տեմպով, եւ դրա շնորհիվ երբեմն կարողանում է ճնշել մրցակիցներին։ Զինագործներն ունեն արագ ու անկանխատեսելի հարձակողական գիծ՝ Օդեգարդի, Մարտինելիի եւ Տրոսարդի գլխավորությամբ, որոնք կարող են վտանգ ստեղծել ցանկացած պահի, սակայն գլխավոր խնդիրն այն է, որ Արտետան իր տրամադրության տակ չունի ընդգծված հարձակվող։ Հիմա կեղծ 9-ը համարի դիրքում խաղում է Միկել Մերինոն։
Շատերը այս մրցաշրջանում ասում են, որ սա «սերուցքայինների» համար վատ տարի է, բայց Բելինգեմն ու ընկերները բոլոր մրցաշարերում պայքարի մեջ են։ Դուրս են եկել Իսպանիայի գավաթի եզրափակիչ, «Լա Լիգայում» 3 միավորով են հետ «Բարսելոնաից», իսկ Չեմպիոնների լիգայում արդեն դուրս են թողել պայքարից «Մանչեսթեր Սիթիին» եւ Մադրիդի «Աթլետիկոյին»։ Անչելոտին կարծես միշտ կարողանում է գտնել հաղթանակի ճանապարհը՝ ունենալով բազմաթիվ խնդիրներ կազմում։ Վինիսիուսը «Ոսկե գնդակը» չստանալուց հետո շատ անկարգապահ պահվածքով է աչքի ընկնում եւ չունի անցած տարվա արդյունավետությունը։ Պետք է այս դիմակայությունում կարողանա ցույց տալ, որ նա «մեծ խաղերի» ֆուտբոլիստ է։
Լուսանկարը` Reuters
«Արսենալը» պարտավոր է խաղալ իրենց ամենաուժեղ խաղը, քանի որ մադրիդցիներն անկախ հաշվից եւ իրավիճակից խաղում են մինչեւ վերջին րոպեն։ Պետք է օգտագործեն իրենց երիտասարդ ու արագ հարձակումը։ «Ռեալ Մադրիդը» Իսպանիայի գավաթի կիսաեզրափակչում ցույց տվեց իր բոլոր պաշտպանական բացերը եւ նույնիսկ Լունինը իրեն նման չեր։ «Ռեալի» հարձակումը լավ վիճակում է, իսկ Բելինգեմը ամեն խաղում ապացուցում է, որ լավագույն կիսապաշտպաններից մեկն է աշխարհում։ Այս դիմակայությունում մեծ դեր կխաղա այն, որ պատասխան խաղը լինելու է «Բերնաբեու»-ում, եւ եթե Լոնդոնում կարող են սխալներ լինել, ապա Մադրդում դրանք կուղղվեն։ Անչելոտիի թիմը պետք է որ հասնի կիսաեզրափակիչ։
«Բարսելոնա» –«Բորուսիա» Դորտմունդ
«Բարսելոնան», ինչպես միշտ, ապավինում է իր ավանդական ֆուտբոլին՝ բարձր պաշտպանական գիծ ու կոմբինացիոն ֆուտբոլ։ Նրանք դեռ շարունակում են կենտրոնանալ իրենց սեփական խաղի վրա՝ առանց շատ կախվելու անհատական կատարողներից։ Հարձակվողի դիրքում կարող է հայտնվել ցանկացած խաղացող՝ սկսած Լամին Յամալից վերջացրած Ժյուլ Կունդեով։ Վստահ հաղթանակներով կատալոնացիները հասել են 1/4 եզրափակիչ եւ ունեն բոլոր նախադրյալները կիսաեզրափակչում հայտնվելու համար։
«Բորուսիան», կարելի է ասել, անակնկալ ձեւով է հասել այս փուլ։ Գերմանիայում գործերը այնքան էլ լավ չեն, թիմն իրարից շատ տարբերվող խաղեր է անցկացնում, բայց Չեմպիոնների լիգայում զարմանալիորեն կայուն է։ 1/16 փուլում այն առաջին իսկ խաղում սպանեց ինտրիգը «Սպորտինգի» հետ դիմակայությունում, իսկ 1/8-ում համառության շնորհիվ դուրս թողեց պայքարից ֆրանսիական «Լիլ»-ին։ Նիկո Կովաչը հեշտ չի հանձնվի Հանսի Ֆլիկին ու արժանի մրցակցություն կցուցաբերի։
Լուսանկարը` Reuters
«Բարսելոնան» շատ ավելի կայուն ու կազմակերպված է, Հանսի Ֆլիկը առանց խոչընդոտների հաղթում է վերջին խաղերում։ Թիմը հրաշալի մարզավիճակում է եւ միակ կորուստը Դանի Օլմոն է։ Կտեսնենք բաց եւ գոլառատ խաղեր, որտեղ, կարծում ենք, կհաղթի «Բարսելոնան»։
Եզրակացություն
Չեմպիոնների լիգայի քառորդ եզրափակիչները կբերեն ուժեղ եւ հետաքրքիր մրցակցություն։ Ֆուտբոլում յուրաքանչյուր խաղ կարող է անակնկալներ բերել, անհնարինը եւս հնարավոր է, բայց մեր կանխատեսմամբ՝ կիսաեզրափակիչներում կտեսնենք Մադրիդի «Ռեալին», «Բավարիային», ՊՍԺ-ին եւ «Բարսելոնային»։
Դավիթ Մակարյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: