Ձմեռային դադարից հետո վերսկսվել է Հայաստանի ֆուտբոլի առաջնությունը։
Մրցաշրջանի երկրորդ հատվածը խոստանում է լինել բավական հետաքրքիր եւ դրամատիկ։ Mediamax Sport-ն անդրադարձել է չեմպիոնության համար պայքար մղող ակումբներին, ովքեր տեղ են զբաղեցնում մրցաշարային աղյուսակի առաջին քառյակում։
«Արարատ-Արմենիա»
Լուսանկարը` Ararat Armenia
«Արարատ-Արմենիա»-ն, ինչպես նախորդ հինգ մրցաշրջաններում, այս տարի եւս պայքարում է չեմպիոնության համար։
Վարդան Մինասյանի գլխավորած թիմը 20 հանդիպումից հետո զբաղեցնում է մրցաշարային աղյուսակի 4-րդ հորիզոնականը՝ 39 միավորով։
«Արարատ-Արմենիա»-ն խաղում է բավականին հարձակողական ֆուտբոլ։ Ակումբի կազմում աչքի է ընկնում հատկապես նիգերիացի եզրային հարձակվող Տենտոն Յենեն, որը 20 խաղում իր հաշվին գրանցել է 10 գոլ եւ 5 գոլային փոխանցում։ Լավ է հանդես գալիս նաեւ թիմի նորեկ, կամերունցի հարձակվող Մարիուս Նուբիսին, որը խփել է 8 գոլ։
Այնուամենայնիվ, Մինասյանի թիմն այս մրցաշրջանում խնդիրներ ունի հատկապես ուժեղ մրցակիցների հետ հանդիպումներում։ Օրինակ՝ «Ուրարտու»-ի դեմ անցկացրած երկու խաղերում էլ պարտվել է (3:1, 1:2)։ Նույն պատկերն է նաեւ «Նոա»-ի դեմ խաղերում (2:1, 0:1)։ Իսկ «Փյունիկ»-ի դեմ կայացած հանդիպումներում ունի մեկ պարտություն (1:3) եւ մեկ հաղթանակ (2:1)։
Թիմի խաղի վրա կարող է ազդել նաեւ Արթուր Սերոբյանի տեղափոխությունը «Շերիֆ» (վարձավճարով)։ Նա ակումբի առաջատարներից էր եւ կարեւոր դեր էր խաղում Մինասյանի համակարգում։
«Փյունիկ»
Լուսանկարը` Pyunik
Հայաստանի առաջնության գործող չեմպիոնը այս տարի եւս պայքարում է չեմպիոնության համար։
Եղիշե Մելիքյանի գլխավորությամբ «Փյունիկ»-ը շարունակում է մնալ առաջնության ամենահավասարակշռված թիմը, չնայած մերթընդմերթ սայթաքումներին։
Ձմեռային տրանսֆերային պատուհանի ընթացքում ակումբը զգալիորեն ուժեղացրեց կազմը։ Թիմին միացան ակումբի նախկին ֆուտբոլիստ Վարազդատ Հարոյանը, ֆրանսիացի եզրային պաշտպան Ժոել Բոպեսուն եւ մի քանի այլ ֆուտբոլիստներ։
«Փյունիկ»-ն այս պահին մրցաշարային աղյուսակի 3-րդ հորիզոնականում է՝ 40 միավորով, 9 միավորով զիջելով «Նոա»-ին։ Սակայն պետք է հիշել, որ «Փյունիկ»-ի համար նման միավորային տարբերությունը չեզոքացնելը երբեք խնդիր չի եղել։ Օրինակ՝ 2021-2022 մրցաշրջանում, երբ նրանք առաջնության հենց այս նույն հատվածում առաջատար «Արարատ-Արմենիա»-ին զիջում էին 8 միավոր, միեւնույն է, դարձան չեմպիոն։
«Ուրարտու»
Լուսանկարը` Urartu
«Ուրարտու»-ն Հայաստանի առաջնության ամենաանկանխատեսելի թիմերից մեկն է։ 2022-2023 մրցաշրջանում չեմպիոն դառնալուց հետո այս տարի եւս պայքարում է բաղձալի հաղթանակի համար։
Ակումբն այս մրցաշրջանում աչքի է ընկնում հարձակողական խաղով. մինչ այժմ կայացած հանդիպումներում «Ուրարտու»-ն ընդամենը մեկ խաղում գոլ չի հեղինակել («Փյունիկ»-ի դեմ՝ 0:0)։
Դմիտրի Գունկոյի գլխավորած թիմը առաջատար «Նոա»-ին զիջում է 5 միավոր, եւ առաջնության այս հատվածում հատկապես կարեւոր է լինելու նրանց միջեւ կայանալիք հանդիպումը։
«Նոա»
Լուսանկարը` Noah
2024 թվականի բուռն ելույթներից հետո «Նոա»-ն ամբողջ ուշադրությունը կենտրոնացրել է Հայաստանի առաջնությունը վերջապես հաղթելու վրա։
«Նոա»-ի հաջողությունների մեծ մասը կապված է 2023 թվականին ակումբի մարզչական փոփոխությունների հետ։ Այդ տարի գլխավոր մարզչի պաշտոնը ստանձնեց պորտուգալացի Ռուի Մոտան, որը փորձառության շնորհիվ հիմնովին վերափոխեց թիմի խաղաոճն ու մարտավարական մոտեցումները։
Մոտայի գլխավորությամբ թիմը որդեգրեց խաղաոճ, որը համատեղում է եվրոպական ժամանակակից ֆուտբոլը՝ բարձրակարգ հարձակողական խաղով եւ կազմակերպված պաշտպանությամբ։
Այս մրցաշրջանում «Նոա»-ն բոլոր առումներով գերազանցում է մոտակա մրցակիցներին՝ խփելով առաջնությունում ամենաշատ գոլերը (64) եւ բաց թողնելով ամենաքիչը (10)։
Իսկապես, դժվար կլինի այս տեմպով առաջ շարժվող «Նոա»-ին կանգնեցնելը, հատկապես, երբ թիմը 5-9 միավորով գերազանցում է մոտակա մրցակիցներին։ Ի դեպ, «Նոա»-ն նրանցից մեկ խաղ պակաս է անցկացրել։
Արտուշ Հարությունյան
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: