Հայ մարզիկների հաղթական պատասխանը Թուրքիային

Հայոց Մեծ Եղեռնի հիշատակի օրը՝ հարգելով բոլոր անմեղ զոհերի հիշատակը, պետք է փաստենք, որ Հայաստանի Հանրապետություն ունենալու, մեր կերտած հաղթանակների եւ ապրելու շնորհիվ ենք ամեն անգամ ապացուցում, որ մենք կանք ու շարունակելու ենք կառուցել մեր երկիրը:

Դրանց լավագույն օրինակներից են մեր մարզիկների հաղթանակները: Mediamax Sport-ը որոշեց ներկայացնել դրանցից մի քանիսը, որոնք նրանք տոնել են Թուրքիայի ներկայացուցիչների նկատմամբ:

Արթուր Ալեքսանյան-Չենկ Իլդեմ

Օլիմպիական, Աշխարհի ու Եվրոպայի չեմպիոն Արթուր Ալեքսանյանը մեկ անգամ չէ, որ հանդիպել է թուրք Չենկ Իլդեմին: Մեր ըմբիշը բոլոր գոտեմարտերում էլ նրան հաղթել է եւ արել է դա գեղեցիկ, տպավորիչ ու արդար պայքարում:

Միշտ էլ գորգ դուրս գալուց առաջ Իլդեմը զգացել է, որ կրկին պարտվելու է, միգուցե դրանով է պայմանավորված, որ գոտեմարտերի ընթացքում սկսում է ոչ սպորտային կեցվածք դրսեւորել: Չնայած դրան, Արթուրը երբեք չի տրվում սադրանքներին, այլ պարզապես տոնում է հերթական հաղթանակը:



Վալոդյա Ֆրանգուլյանի 10-0-ն

2017 թվականի Եվրոպայի առաջնությունը հաջող դասավորվեց ազատ ոճի ըմբիշ Վալոդյա Ֆրանգուլյանի համար: Մեր ըմբիշը դարձավ բրոնզե մեդալակիր:

3-րդ տեղի համար պայքարում Ֆրանգուլյանը գոտեմարտելու էր Աբդի Չուռնաչիի դեմ: Գորգ դուրդ գալով վստահ ու միայն հաղթանակի հետեւից ՝ հայ մարզիկը ոչ մի հնարավորություն չտվեց մրցակցին: Մեկ րոպեն բավական էր, որ նա մաքուր հաղթանակ տոներ՝ 10:0:



Գեւորգ Ղարիբյանի ոսկե հաղթանակը

Գեւորգ Ղարիբյանն այս տարի Եվրոպայի առաջնությունում նվաճեց չեմպիոնի կոչումը:

Որոշիչ գոտեմարտը նա անցկացրեց թուրք Քերեմ Քամալի դեմ: Անզիջում ու դրամատիկ պայքարով լի հանդիպման հերոսը Ղարիբյանն էր: Նա կարողացավ օգտագործել իր ողջ ուժն ու կանգնել պատվոհարթակի վերին աստիճանին:



Դավթյանի ու Խաչատրյանի հայկական պատվոհարթակը

Ծանրամարտում եւս հայ մարզիկները սիրում են առաջ անցնել մրցակիցներից ու կանգնել պատվոհարթակի ամենաբարձր աստիճանին:

2007 թվականի Եվրոպայի առաջնության ժամանակ այդպես վարվեցին Գեւորգ Դավթյանն ու Արա Խաչատրյանը, որոնք հանդես էին գալիս նույն քաշային կարգում:

Դավթյանը երկրորդ տարին անընդմեջ հռչակվեց Եվրոպայի չեմպիոն, իսկ Խաչատրյանն՝ արծաթե մեդալակիր: Նրանք կարողացան առաջ անցնել թուրք Թաներ Սագիրից, որը բավարարվեց երրորդ տեղով:



Շախմատիստները «գրավեցին» Ստամբուլը

Հայաստանի շախմատի հավաքականը մեկ անգամ չէ, որ անմոռանալի պահեր է պարգեւել մեզ:

Այդպիսին էր նաեւ 2012 թվականը, երբ թուրքական Ստամբուլն անցկանցում էր Համաշխարհային Օլիմպիադան: «Բոլորիս մոտ այնքան մեծ էր հաղթելու ցանկությունը, որ բառերով չեմ կարող նկարագրել: Այդպիսի ուրախություն ես չէի ունեցել»,-ավելի ուշ խոստովանել էր Լեւոն Արոնյանը:

Նա իր թիմակիցներ Սերգեյ Մովսիսյանի, Վլադիմիր Հակոբյանի, Գաբրիել Սարգսյանի եւ Տիգրան Պետրոսյանի հետ դարձավ ոսկե մեդալակիր:



Երիտասարդ ֆուտբոլիստներն ու անհավանական «Հրազդան» մարզադաշտը

Հայաստանի ֆուտբոլի երիտասարդական հավաքականը Եվրոպայի առաջնության ընտրական մրցաշարի խմբային փուլում հայտնվել էր Թուրքիայի հասակակիցների հետ:

Շոգ օգոստոսյան այդ երեկոն ավելի թեժ էր «Հրազդան» մարզադաշտում, որտեղ մեր տղաները կարողացան կամային հաղթանակ տանել: Չնայած պարտվում էին, բայց Կառլեն Մկրտչյանը հավասարեցրեց հաշիվը, իսկ ավելացված ժամանակում Հայաստանին հաղթանակ բերեց Հենրիխ Մխիթարյանի գոլը: Սեփական հարկի տակ նման հաջողությունն աննկարագրելի էր բոլորի համար:



Արթուր Աբրահամի հասցրած նոկաուտը

Պրոֆեսիոնալ ռինգում տարիներ շարունակ անպարտելի էր Արթուր Աբրահամը: Նրա յուրաքանչյուր մենամարտ մեծ ոգեւորություն էր առաջացնում Հայաստանում:

2009-ին նրա մրցակիցը Մահիր Օրալն էր: IBF վարկածով Աշխարհի չեմպիոն Աբրահամը պարզապես հիանալի գործեց: Հուժկու եւ դիպուկ հարվածներ, որոնց արդյունքում 10-րդ ռաունդում մրցակիցն արդեն տեխնիկական նոկաուտի մեջ էր: Իսկ Արթուրը կրկին չեմպիոնական գոտու տիրակալը:



Գոհար Նալբանդյան