Սլավիկ Գալստյանը տպավորիչ հաղթանակով դարձավ Աշխարհի կրկնակի բրոնզե մեդալակիր

Այսօր Զագրեբում ավարտին մոտեցող հունահռոմեական ոճի ըմբշամարտի Աշխարհի առաջնությունում Հայաստանի հավաքականի 3-րդ մեդալը նվաճել է Սլավիկ Գալստյանը։

Նա մինչեւ 67 կգ քաշային կարգի բրոնզե մեդալի համար պայքարում հանդիպել է Ռազակ Բեյշեկեեւին (Ղրղզստան)։ Առաջին մրցափուլում մրցակիցը շատ վճռական է մեկնարկել ու առաջ անցել 5:0 հաշվով, Գալստյանին հաջողվել է 1 միավոր հետ բերել։

Երկրորդում հայ ըմբիշն է մրցակցին անակնկալի բերել ու գեղեցիկ հնարքով նախ հավասարեցրել է հաշիվը, ապա առաջ անցել 9:5 հաշվով։ Դրանով էլ Գալստանը չի բավարարվել ու շարունակել է տանջել մրցակցին՝ հաշիվը դարձնելով 13:5: 

Եվրոպայի կրկնակի բրոնզե մեդալակիրը կարեւոր հաղթանակ է տարել ու արդեն 2 բրոնզ ունի նաեւ ԱԱ-ում, առաջին անգամ նա հաղթել է 2019-ին Նուր-Սուլթանում։

Այսօր ավելի վաղ Գալստյանը սփոփիչ գոտեմարտում 4:1 հաշվով ուժեղ է եղել Ցուչիկա Շիմոյամադայից (Ավստրալիա)։

ԱԱ-ում Մալխաս Ամոյանը (77 կգ) հռչակվել է Աշխարհի չեմպիոն, իսկ Հրաչյա Պողոսյանը (60)՝ դարձել բրոնզե մեդալակիր։