Միհրան Հարությունյանը MMA-ն համատեղելու է ըմբշամարտի հետ

Ռիոյի Օլիմպիական խաղերի արծաթե մեդալակիր, հունահռոմեական ոճի ըմբիշ Միհրան Հարությունյանն այսուհետեւ հանդես է գալու նաեւ MMA-ում:

Այդ մասին հայտնել է MMA-ի գործակալ Ռիզվան Մագոմեդովը:

«Շտապում եմ ձեզ հետ հետաքրքիր նորությամբ կիսվել: Բոլորիս հայտնի Միհրան Հարությունյանը մտնում է իր համար նոր՝ MMA-ի աշխարհ: Կասկած չունեմ, որ նա կկարողանա հաջողությունների հասնել այս մարզաձեւում: Համագործակցելու ենք ու ամեն ինչ կանենք բարձր նվաճումների հասնելու համար»,- Instagram-ի իր էջում գրել է Մագոմեդովը:

Հայաստանի ըմբշամարտի ֆեդերացիայի փոխնախագահ Արսեն Բադալյանը եւ Հարությունյանի անձնական մարզիչ Սամվել Գեւորգյանը Mediamax Sport-ին ասել են, որ Հարությունյանը համատեղելու է ըմբշամարտն ու խառը մենամարտերը:

«Մեզ համար կարեւորը Միհրանի առողջությունն է, որ նա ամբողջովին վերականգնվի ու իրեն լավ զգա»,- նշել է Բադալյանը:

«Միհրանին MMA-ից պայմանագիր են առաջարկել, եւ նա ընդունել է: Սակայն դա չի նշանակում, որ նա կթողնի ըմբշամարտը»,- ասել է Գեւորգյանը:

Ռիոյի Օլիմպիական խաղերից հետո ըմբիշը ելույթ չի ունեցել: Նա մի քանի անգամ ձեռքի վիրահատության է ենթարկվել ու վերականգնման փուլում է: