Սամվել Գասպարյան. Չեմ համակերպվում ԱԱ-ի մեդալի գույնի հետ, բայց չեմ էլ ընկճվում

Սամվել Գասպարյանը երեկոյան Բոգոտայում իր կարիերայի առաջին մեդալը նվաճեց Աշխարհի առաջնությունում: Նա մինչեւ 102 կգ քաշային կարգում 389 կգ-ով բրոնզե մեդալակիր դարձավ:

Mediamax Sport-ին ծանրորդը պատմել է բարդ մրցաշարի, իր գործադրած ջանքերի, մեդալի կարեւորության ու քաղած դասերի մասին:

«Մրցակցությունը շատ մեծ էր, ես էլ հաղթելու հիմնական թեկնածուներից մեկն էի: Բավական փորձառու ծանրորդներ էին իմ քաշային կարգում ներկայացված՝ Աշխարհի, Եվրոպայի ու Օլիմպիական խաղերի չեմպիոններ, բայց դա ինձ չէր հետաքրքրում, միակ նպատակս իմ պատվիրած կիլոգրամները բարձրացնելն էր:

Մեդալների համար պայքարը շատ թեժ ստացվեց: Մի կողմից կիլոգրամների համար էր մրցակցություն, մյուս կողմից՝ մրցավարական թյուրիմացություն եղավ, բայց ի վերջո բրոնզե մեդալ նվաճեցի մեր երկրի ու թիմի համար: Չկարողացա իմ ցանկացած կիլոգրամները բարձրացնել:

Այդ մեդալը մեր թիմին հիմա շատ էր պետք, թեկուզ այն բրոնզ է, բայց ցույց է տալիս, որ այսքան ամիսների ծանր մարզումներն իզուր չեն եղել: Ինձ համար այն դաս էր, որ էլ ավելի քրտնաջան է պետք պարապել:

Լուսանկարը` Անձնական արխիվ